‘नेपाल आहारपूरक सौन्दर्यवर्द्धक संघको सातै प्रदेशमा शाखा विस्तार गर्दै छौँ’– विनोद विष्ट (भिडियोसहित)

नेपाल हेल्थ न्युज, काठमाडौं । नेपाल आहारपूरक सौन्दर्यवर्द्धक संघ (एनएनसीए) ले सातै प्रदेशमा संगठन विस्तार अभियान शुरु गरेको छ ।

जिल्ला जिल्लामा व्यवसायीहरु छरिएर रहेकाले केन्द्रले सबै ठाउँमा नभ्याउने कारण प्रदेश शाखा विस्तार शुरु गरिएको संघका केन्द्रीय उपाध्यक्ष विनोद विष्टले नेपाल हेल्थ न्युजलाई जानकारी गराउनुभयो ।

उहाँले भन्नुभयो–‘७७ जिल्लामा छरिएर रहेका व्यवसायीलाई केन्द्रमा समन्वय गरेर काम गर्न गाह्रो भएकाले तत्काल सात प्रदेशबाट संगठन विस्तारको कार्य सुरु गरेका छौँ ।’

यसअघि मधेश प्रदेशमा संगठन विस्तार सम्पन्न भइसकेको छ । बिष्टका अनुसार यही माघ ५ गते शनिवार संघले बागमती प्रदेशमा समेत संगठन विस्तार गर्न लागेको छ । काठमाडौंको कान्तिपथ स्थित एल्लोप्यागोडा होटलमा कार्यक्रम गरिने भएको छ । प्रदेश संगठन विस्तार पछि केन्द्रलाई काम गर्न थप सहयोग मिल्ने उहाँको विश्वास छ ।

त्यसैगरी हाल संगठन विस्तारका विषयमा कोशी प्रदेशका व्यावसायीसँग छलफल भइरहेको उहाँले जानकारी दिनुभयो । उहाँ थप्नुहुन्छ–‘कोशी प्रदेशमा संगठन विस्तारको काम सम्पन्न हुने वित्तिकै लुम्बिनी प्रदेश संगठन विस्तारको काम शुरु गर्ने योजना बनाइरहेका छौं ।’

व्यवसायिक हकहित, सुरक्षा र सामाजिक उत्तरदायित्व अन्तर्गतको उद्देश्य लिई बि.सं. २०८० साल चैत २२ गते नेपाल आहारपुरक सौन्दर्यवर्द्धक संघ (एनएनसिए) को स्थापना भएको थियो । हाल एनएनसिए देशका ६ सय भन्दा बढी आहारपुरक न्युट्रास्युटिकल सौन्दर्यवर्द्धक व्यवसाय गर्ने व्यवसायीहरुको छाता संगठन हो ।

भिडियो हेर्नुहोस्