अस्पतालको लिफ्ट बिग्रँदा सास्ती
धनगढीस्थित सेती अञ्चल अस्पतालमा बिग्रिएको लिफ्ट मर्मत नहुँदा बिरामीले सास्ती खेप्नु परेको छ । बिरामीलाई माथिल्लो तलामा बोकेर लानुपर्ने बाध्यता छ । ‘बिरामी भएर आएँ,’ डडेल्धुराबाट खुट्टाको उपचारका लागि आएकी कलावती बलले भनिन्, ‘दुई तलासम्म हिँडेर जाँदा साह्रै दुःख भयो ।’
अस्पतालमा आउने अधिकांश बिरामीलाई माथिल्लो तला आउजाउ गर्न सकस परेको छ । हिँड्न नसक्नेलाई बोकेर लैजानुपर्ने बाध्यता छ । ‘छातीमा पानी भरिएर उपचार गर्न आएका बेला २ तलामाथि उक्लिँदा श्वास फुलेर झन् गाह्रो भयो,’ उपचारका लागि आएका टेकराज भट्टले भने । उनले सामान्य बिरामीलाई त्यति गाह्रो नभए पनि सिकिस्त, बालक र वृद्धहरूलाई लिफ्ट नहुँदा निकै सास्ती हुने बताए ।
‘एक तलासम्म त हवील चेयरमा राखेर ल्याएँ, यसपछि मुटुरोगी आमालाई हिँडाएर माथिल्लो तलामा ल्याउनुपर्यो,’ बैतडी सिगास गाउँपालिका १ बाट आमाको उपचारका लागि आएकी निर्मला भुलले भनिन्, ‘अस्पतालमा भएको लिफ्ट नबनाउँदा धेरै गाह्रो भएको छ ।’