डेंगु नियन्त्रण लागि ‘फगिङ’ गर्न दबाब, पहाडी जिल्लामा पनि डेंगु
२०७६, २ भाद्र सोमबार ०४:५२ मा प्रकाशित
डेंगु संक्रमणले महामारीको रुप लिन थालेपछि झापाको दमकमा लामखुट्टे मार्न विषादीयुक्त धुवाँ (फगिङ) छर्किन नगरपालिकालाई स्थानीयले दबाब दिन थालेका छन् । मानव स्वास्थ्यमा प्रतिकुल असर पर्न सक्ने भन्दै नगरपालिकाले यो गर्न छाडे पछि तिब्र दबाब सिर्जना भएको बताइन्छ ।
धुवाँ फैलेपछि लामखुट्टे मरे पनि त्यसका लार्भा तथा अण्डा नष्ट नहुने भएकाले सिधै श्रोत पहिचान गरेर नष्ट गर्ने कार्य प्रभावकारी हुने बताईंदै आएको छ ।
‘हामी श्रोत पहिचान गरी लामखुट्टेका लार्भाहरु नष्ट गरिरहेका छौं तर विषादी नछर्केको भनेर हामी माथि स्थानीयको दबाब परिरहेको छ ।’ दमक नगरपालिका स्वास्थ्य शाखा प्रमुख इन्द्र अर्यालले भन्नुभयो ।
‘दमकसहित झापामा अहिलेसम्म दुईसय २३ जनामा डेंगु देखिएको छ । दमकमा पछिल्लो तथ्याङ्क अनुसार एकसय २७ जनामा डेंगु देखिएको स्वास्थ्य शाखा प्रमुख अर्यालले बताउनुभयो । यसलाई फैलन नदिन हामी सचेतना र लार्भा नष्ट गर्ने कार्यमा लागेका छौ ।’ उहाँले भन्नुभयो ।
दमक वडा नं. ६ का वडाध्यक्ष टेकबहादुर थापाका अनुसार वडामा विरामीको संख्या बढेपछि वडाबासीले लामखुट्टे मार्न विषादीयुक्त धुवाँ लागि आग्रह गरिरहेका छन् । रोग फैलन नदिन आफुहरुले आवश्यक शर्तकता र सबै उपाय अवलम्बन गर्नका लागि स्वास्थ्य शाखासँग अनुरोध गरिएको छ ।
स्वास्थ्यकर्मीहरुका अनुसार डेंगु भाइरसद्वारा संक्रमित भएको एडिस एजिप्टाई जातको पोथी लामखुट्टेले सार्दछ । यो रोग सार्ने लामखुट्टे ग्रामीण क्षेत्रभन्दा शहरी क्षेत्रमा बढी पाइने भएकाले यसलाइ शहरीया समस्याको रुपमा लिइन्छ ।
पहाडी क्षेत्रमा पनि प्रभाव
स्वास्थ्य कार्यालय झापाका अनुसार डेंगु रोगको उच्च जोखिममा झापा जिल्ला रहेको छ । पछिल्लो पटक अस्पतालका अनुसार पहाडी जिल्लाहरु इलाम र पाँचथरबाट समेत डेंगुका विरामी उपचारका लागि झापामा आउने गरेका छन् ।
स्वास्थ्य कार्यालय झापाका डेंगु रोगका ‘फोकल पर्सन’ जीवन चौलागाईंका अनुसार अस्पतालबाट आएका रेकर्ड हेर्दा इलाम र पाँचथरबाट समेत विरामी आएका छन् । पहाडी जिल्लामा पनि डेंगु सार्ने लामखुट्टे पुगेको हुनसक्छ र यसलाई सुक्ष्म रुपमा हेरिनुपर्छ, उहाँले भन्नुभयो । विष्णुप्रसाद पोखरेल/ गोरखापत्रबाट
