Logo
|
Friday 29th March 2024
Logo

epaper

डा. केसीको अनशनलाई सरकारले दिएन वार्ताको चासो



मेडिकल कलेजहरूले विद्यार्थीसँग असुलेको बढी रकम फिर्तालगायत माग राख्दै १७औँ अनशन थालेका डा. गोविन्द केसीसँग सरकारले वार्ता गर्ने चासो नै देखाएको छैन । अनशनको चौथो दिन बिहीबार डा. केसीको स्वास्थ्य भने झन् बिग्रिँदै गएको छ ।

डा. केसीको स्वास्थ्य अस्थिर देखिएको उपचारमा संलग्न चिकित्सक डा. जितेन्द्र कँडेलले बताए । रक्तचाप तलमाथि भइरहेको र बुधबारदेखि पिसाबमा बढेको एसिटोनको मात्रा नियन्त्रणमा नआएको उनले बताए । चिसोका कारण स्वास्थ्य समस्या बढेको उनले बताए । डडेल्धुरा सदरमुकामको एक घरमा अनशन बसिरहेका केसीलाई जिल्ला अस्पताल सार्नुपर्ने सुझाब चिकित्सकहरूको छ ।

यसैबीच, केसीको अनशनमा ऐक्यबद्धता जनाउँदै बिहीबार डडेल्धुरामा दबाब -याली निकालिएको छ । सहभागीले डडेल्धुरा अस्पतालमा दरबन्दीअनुसार चिकित्सक व्यवस्था गर्नुपर्ने, जिल्लामा मेडिकल कलेज सञ्चालनको निर्णय गर्नुपर्नेलगायत माग गरेका छन् । केसीको जीवन रक्षासँगै उनका सम्पूर्ण माग पूरा गर्न पनि दबाब दिएका छन् ।

शुल्क फिर्ताका लागि विद्यार्थीले मेडिकल कलेजमै आन्दोलन गर्ने, काठमाडौंबाट फर्किए
मेडिकल कलेज असुलेको बढी शुल्क फिर्ता नगरेपछि आन्दोलनका लागि काठमाडौं आएका चिकित्सा शिक्षाका विद्यार्थीले पुनः आ–आफ्ना कलेजमै आन्दोलन गर्ने भएका छन् । मंगलबार र बुधबार माइतीघरमा आन्दोलन गरेका उनीहरूले बिहीबार चिकित्साशास्त्र अध्ययन संस्थान (आइओएम)को डिन कार्यालयमा धर्ना दिएपछि सम्बन्धित कलेजमै फर्किने निर्णय गरेका हुन् । चिकित्सा शिक्षा संघर्ष समितिको अगुवाइमा विद्यार्थीले चार घन्टा धर्ना दिएका थिए ।

विद्यार्थीले डिन डा. जगदीश अग्रवाललाई भेटेर आफ्ना समस्याबारे ध्यानाकर्षण गराए । कलेजले असुलेको शुल्क फिर्ताको पहल गरिदिन आग्रह गरे । तर, डिन अग्रवालले त्यो काम आफ्नो क्षेत्राधिकारभित्र नपर्ने जवाफ दिएपछि विद्यार्थीले डिनबाट राजीनामा दिन चेतावनी दिएका छन् । नयाँपत्रिकाबाट

 

प्रतिक्रिया दिनुहोस्