बागमती प्रदेशको स्वास्थ्य सचिव डा. गौतमको सरुवा

नेपाल हेल्थ न्युज, हेटौँडा। बागमती प्रदेशकी स्वास्थ्य सचिव डा. सुमित्रा गौतमको सरुवा भएको छ । गत ३० असोजमा बसेको मन्त्रिपरिषद् बैठकले उहाँलाई स्वास्थ्य तथा खाद्य स्वच्छता मन्त्रालयमा सरुवा गर्ने निर्णय गरेको हो ।

डा. गौतमको सरुवा भए पनि उहाँको स्थानमा हालसम्म नयाँ सचिव नियुक्त भएको छैन । बागमती प्रदेशको स्वास्थ्य सचिवको जिम्मेवारी कसलाई दिइने भन्ने विषयमा निर्णय हुन बाँकी छ ।

स्त्रीरोग विशेषज्ञ रहनुभएकी डा. गौतम संघअन्तर्गतको दरबन्दीमा कार्यरत हुनुहुन्थ्यो । उहाँ २०८१ पुस ११ गतेदेखि बागमती प्रदेशको स्वास्थ्य सचिवका रूपमा हेटौँडामा कार्यरत रहँदै आउनुभएको थियो ।

हाल बागमती प्रदेशमा स्वास्थ्य सेवाको एघारौँ तहमा छ जना अधिकृत कार्यरत हुनुहुन्छ । उहाँहरूले आफूहरूमध्येबाटै प्रदेशको स्वास्थ्य सचिव नियुक्त गरिनुपर्ने माग गर्दै आउनुभएको छ । प्रदेशमै कार्यरत अधिकृतहरूलाई नेतृत्वको अवसर दिनुपर्ने उहाँहरूको माग छ ।