जो बाइडनलाई प्रोस्टेट क्यान्सर, हड्डीसम्म फैलिएको पुष्टि

नेपाल हेल्थ न्युज,  संयुक्त राज्य अमेरिकाका पूर्व राष्ट्रपति जो बाइडन लाई ८२ वर्षको उमेरमा प्रोस्टेट ग्रन्थिको अत्यन्त आक्रामक प्रकारको क्यान्सर भएको पुष्टि भएको छ। चिकित्सकीय परीक्षणले देखाएको रिपोर्ट अनुसार क्यान्सर हड्डीसम्म फैलिसकेको , र यो अवस्था निकै संवेदनशील रहेको बताइएको छ।

गत शुक्रवार मूत्रप्रणालीमा समस्या देखिएपछि परीक्षण गरिएपछि क्यान्सरको पत्ता लागेको हो। चिकित्सकका अनुसार बाइडनको क्यान्सर ग्लिसन स्कोर ९ हो, जुन प्रोस्टेट क्यान्सरमा सबैभन्दा खतरनाक स्तर मानिन्छ। हाल उनलाई हर्मोन थेरापी दिइँदैछ, जसले क्यान्सरको वृद्धिलाई केही समयका लागि रोक्न मद्दत पुर्‍याउन सक्छ। शल्यक्रिया भने हालको अवस्थामा सिफारिस गरिएको छैन, किनभने क्यान्सर पहिले नै शरीरको अन्य भागमा फैलिसकेको छ। भविष्यमा रेडिएसन वा अन्य थप उपचारहरू आवश्यक हुन सक्छन्।

यस समाचारले अमेरिकाको राजनीतिक वृत्तमा ठूलो तरंग ल्याएको छ। उनका राजनीतिक प्रतिद्वन्द्वीसमेत बाइडनप्रति सहानुभूति व्यक्त गरिरहेका छन्। सामाजिक सञ्जालमा उनलाई शीघ्र स्वास्थ्यलाभको कामना गर्दै हजारौं सन्देशहरू लेखिएको देखिन्छ। बाइडनका प्रवक्ताले भनेका छन् कि उनी “शारीरिक रूपमा स्थिर छन्” र चिकित्सकीय टोलीको सल्लाहअनुसार नियमित उपचारमा छन्। यद्यपि उनका सहयोगीहरू भन्छन्, “बाइडन लड्न तयार छन् – या राजनीतिमा होस् या जीवनमा।”