पठाओको ‘राइड फर अ कज’ अभियानमार्फत बालअस्पताल निर्माणमा सहयोग

नेपाल हेल्थ न्युज, काठमाडौं । टेक कम्पनी पठाओ नेपालले बाल स्वास्थ्य क्षेत्रमा सहयोग पुर्‍याउने उद्देश्यसहित ‘राइड फर अ कज’ अभियान सुरु गरेको छ।

यो अभियान जेठ २७ गतेदेखि असार २ गतेसम्म सञ्चालन हुनेछ, जसबाट संकलित रकम काठमाडौँ इन्स्टिच्युट अफ चाइल्ड हेल्थ (किओच) को निर्माण कार्यमा लगानी गरिनेछ। यो संस्था डा. भगवान कोइरालाको नेतृत्वमा स्थापना हुँदैछ, जसले बालबालिकालाई सहज र गुणस्तरीय उपचार उपलब्ध गराउने लक्ष्य राखेको छ।

पठाओकी मार्केटिङ प्रमुख सुरक्षा हमालका अनुसार, “प्रत्येक राइडबाट प्राप्त आम्दानीको एक अंश कम्पनीकै तर्फबाट अस्पताल निर्माणका लागि छुट्याइनेछ, र यसले राइडरमा कुनै थप भार पर्नेछैन।”

अभियानको उद्देश्य

यो पहल आर्थिक रूपमा कमजोर पृष्ठभूमिबाट आएका बालबालिकाको उपचार पहुँच सुनिश्चित गर्न केन्द्रित छ। संस्थागत सामाजिक उत्तरदायित्व  अन्तर्गत यो कार्यक्रम सञ्चालन गरिएको हो।

संकलित रकमको उपयोग

संकलित रकमबाट अस्पतालको संरचना निर्माण तथा अत्यावश्यक स्वास्थ्य उपकरणहरूको खरिदमा सहयोग पुर्‍याइनेछ।

डा. कोइरालाले सातै प्रदेशमा बाल अस्पताल स्थापना गर्ने योजनासहित अभियान अघि बढाएका छन्। झापामा पहिलो अस्पताल निर्माण सम्पन्न भइसकेको छ भने अब काठमाडौँसहित अन्य प्रदेशहरूमा पनि अस्पतालहरू बनाइँदैछन्।