औषधि व्यवस्था विभागको पेन्टोलोक बजारबाट फिर्ता गर्न निर्देशन

नेपाल हेल्थ न्यूज, काठमाडौं । औषधि व्यवस्था विभागले गुणस्तर नपुगेको भन्दै एक औषधि बजारबाट फिर्ता गर्न निर्देशन दिएको छ। विभागको परीक्षण प्रयोगशालामा गरिएको परीक्षणमा औषधि असफल भएपछि यसको बिक्री, वितरण तथा प्रयोगमा तत्काल रोक लगाइएको हो।

‘पेन्टोलोक (Pantoprazole Tablets IP) नामक औषधिको ब्याच नम्बर TPT-129 (B) लाई विभागले परीक्षणका लागि लिएको थियो। Dissolution Test (Buffer Stage) मा औषधि असफल भएपछि यसलाई दोषयुक्त ठहर गर्दै बजारबाट फिर्ता गर्न निर्देशन दिइएको हो।

उक्त ब्याचको उत्पादन मिति डिसेम्बर २०२४ र म्याद समाप्त हुने मिति नोभेम्बर २०२७ रहेको विभागले जनाएको छ।

विभागले सबै सरोकारवाला निकायलाई उक्त औषधिको बिक्री, वितरण तथा प्रयोग नगर्न निर्देशन दिएको छ। साथै, सर्वसाधारणलाई पनि सो औषधिबाट सावधान रहन आग्रह गरिएको छ।