बहुविशिष्टीकृत बाल अस्पताल निर्माणमा नेपाल लाइफको एक करोडको सहयोगः निजी क्षेत्रको सशक्त कदम

नेपाल हेल्थ न्यूज, काठमाडौं । बाल स्वास्थ्य सेवा विस्तार र गुणस्तरीय उपचार सुनिश्चित गर्न निजी क्षेत्रको सक्रिय सहभागिता दिनानुदिन बढ्दै गएको छ। त्यसै सन्दर्भमा, नेपाल लाइफ इन्स्योरेन्स कम्पनी लिमिटेडले बहुविशिष्टीकृत बाल अस्पताल निर्माणका लागि १ करोड रुपैयाँ सहयोग गरेको छ।

उक्त सहयोग काठमाडौँ इन्स्टिच्युट अफ चाइल्ड हेल्थ (किओच) लाई प्रदान गरिएको हो, जुन गैरनाफामूलक संस्था हो र नेपालको बाल स्वास्थ्य क्षेत्रमा लामो समयदेखि क्रियाशील छ।

कम्पनीको संस्थागत सामाजिक उत्तरदायित्व कार्यक्रम अन्तर्गत गरिएको सहयोग सम्झौतापत्रमा किओचका संस्थापक अध्यक्ष डा. भगवान कोइराला र नेपाल लाइफका सीईओ प्रवीण रमण पराजुली ले हस्ताक्षर गरेका छन्। सम्झौतासँगै राजधानीको बुढानीलकण्ठ नगरपालिका–७ मा निर्माणाधीन बहुविशिष्टीकृत बाल अस्पताल किओच–काठमाडौँ लाई थप गति मिल्ने अपेक्षा गरिएको छ।

क्लिनिकल रिसर्च बिल्डिङबाट सुरु भएको सेवा
हाल अस्पतालको मूल संरचना निर्माणको अन्तिम चरणमा पुगेको छ भने क्लिनिकल रिसर्च बिल्डिङको निर्माण पूरा भई बालबालिकालाई प्रारम्भिक सेवा दिइरहेको किओचले जनाएको छ। यहाँ बाल स्वास्थ्यसम्बन्धी सेवा मात्र नभई नसर्ने रोग अनुसन्धान समेत थालिएको छ। यो अस्पताल भावी दिनमा श्रोत केन्द्रका रूपमा सबै प्रादेशिक बाल अस्पतालहरूलाई मार्गदर्शन गर्ने उद्देश्यले अगाडि बढाइएको हो।

बाल स्वास्थ्य सुधारतर्फको सशक्त पहल
नेपाल लाइफ इन्स्योरेन्सका सञ्चालक कमलेश कुमार अग्रवाल ले कार्यक्रममा बोल्दै भन्नुभयो, “डा. कोइरालाको नेतृत्वमा अघि बढिरहेको किओच परियोजनाले नेपालमा बाल स्वास्थ्य सेवा सुधारमा ऐतिहासिक भूमिका खेल्नेछ।” उहाँले निजी क्षेत्रको सहकार्यबाट नागरिकलाई गुणस्तरीय र सर्वसुलभ स्वास्थ्य सेवा दिन सकिने विश्वास पनि व्यक्त गर्नुभयो।

कम्पनीका प्रमुख कार्यकारी अधिकृत प्रवीण रमण पराजुलीले नेपाल लाइफले स्वास्थ्य, शिक्षा, संस्कृति र सामाजिक क्षेत्रमा रूपान्तरण ल्याउने प्रयासस्वरूप विभिन्न कार्यक्रम गर्दै आएको जानकारी दिनुभयो। “हामी किओचको अभियानमा जोडिन पाउँदा गौरवान्वित छौँ,” उहाँले भन्नुभयो, “भविष्यमा राजधानी मात्र होइन, सातै प्रदेशमा बाल अस्पताल स्थापनामा पनि हाम्रो योगदान रहनेछ।”

सहकार्यबाट थप हौसला
किओचका संस्थापक डा. भगवान कोइरालाले नेपाल लाइफको योगदानप्रति आभार प्रकट गर्दै यस्तो सहकार्यले संस्थालाई थप हौसला मिलेको बताउनुभयो। “नेपाल लाइफ जस्तो प्रतिष्ठित संस्थाले हाम्रो अभियानमा विश्वास गरेर साथ दिनु अत्यन्त महत्त्वपूर्ण छ,” उहाँले भन्नुभयो, “यस्तो साझेदारीले हाम्रो लक्ष्य हासिल गर्ने गति बढाएको छ।”

किओच–दमक बाल अस्पतालः सफलता र उदाहरण
किओचको पहिलो नमुना अस्पतालको रूपमा किओच–दमक बाल अस्पताल स्थापना भई सेवा दिइरहेको छ। यहाँ आकस्मिक सेवा, बहिरङ्ग–अन्तरङ्ग सेवा, शल्यक्रिया, प्रयोगशाला, रेडियोलोजी, पीआईसीयू , एनआईसीयू , एचडीयु लगायत सेवा उपलब्ध छन्। यसले किओचले लक्ष्य लिएको देशभर बाल अस्पतालहरूको ‘हब एण्ड स्पोक’ मोडल मा अघि बढ्ने संकेत गर्छ।

निजी क्षेत्रको सामाजिक उत्तरदायित्वको उदाहरण
नेपाल लाइफको यो सहयोग केवल आर्थिक मात्र होइन, निजी क्षेत्रले स्वास्थ्य क्षेत्रप्रति देखाएको सकारात्मक चिन्तन र प्रतिबद्धताको स्पष्ट उदाहरण हो। बालबालिकालाई समर्पित अस्पताल निर्माणजस्तो दीर्घकालीन महत्वको परियोजनामा निजी क्षेत्रको सहभागिता हुनु स्वास्थ्य नीतिका लागि समेत प्रेरणादायी बन्न सक्छ।

सरकारी प्रयासहरूलाई सघाउँदै निजी क्षेत्रले यस्ता पहलकदमी लिएमा देशभर समावेशी र समुचित बाल स्वास्थ्य सेवा पु¥याउने मार्ग सहज बन्नेछ। किओच र नेपाल लाइफबीचको सहकार्य बाल स्वास्थ्यको उज्यालो भविष्य तर्फको यात्रा हो जसले हजारौँ बालबालिकाको जीवनमा स्वास्थ्य र आशाको उज्यालो ल्याउनेछ।