एमआरआई मेसिनमा तानिँदा ६१ वर्षीय व्यक्तिको मृत्यु

नेपाल हेल्थ न्युज, न्यूयोर्क । न्यूयोर्कको लङ आइल्यान्डस्थित एक मेडिकल केन्द्रमा एमआरआई स्क्यानका क्रममा दुःखद घटना भएको छ। ६१ वर्षीय पुरुषको मृत्यु त्यतिबेला भयो जब उनी एक सक्रिय एमआरआई मेसिनमा प्रवेश गरे र उनको घाँटीमा रहेको भारी धातुको गहना चुम्बकीय बलले मेसिनतिर तानेर उनी घाइते भए। उपचारको क्रममा उनको ज्यान गएको पुष्टि गरिएको छ।

नासाउ काउन्टीको ओपन एमआरआई सेन्टरमा भएको यो घटना प्रहरीले पुष्टि गरेको हो। प्रारम्भिक अनुसन्धान अनुसार, मृतक किथ म्याकएलिस्टर नामक व्यक्ति स्क्यानका लागि पत्नीको साथमा मेडिकल सेन्टर पुगेका थिए। उनकी श्रीमती एड्रनिन म्याकएलिस्टरले घुँडाको एमआरआई गराइरहेकी थिइन् र स्क्यान सकिएपछि उनलाई सहयोग गर्न श्रीमानलाई भित्र बोलाएको बताइएको छ।

उनले भित्र जाँदा, झण्डै ९ किलोग्राम तौल भएको धातुको चेन उनीसँगै थियो। अत्यन्त शक्तिशाली चुम्बकीय बलले चेनलाई तानेपछि उनी त्यसैसँगै मेसिनमा तानिए र गम्भीर चोट लाग्यो।

एमआरआई कोठाको सुरक्षा र सावधानीहरू
एमआरआई (म्याग्नेटिक रेजोनान्स इमेजिङ) स्क्यान अत्यन्त शक्तिशाली चुम्बकीय क्षेत्रमार्फत शरीरको भित्री अंगहरूको छवि प्राप्त गर्न प्रयोग गरिन्छ। यही चुम्बकीय प्रभावका कारण स्क्यानको समयमा वा त्यस क्षेत्रभित्र छिर्दा कुनै पनि धातुजन्य वस्तु प्रतिबन्धित हुन्छ।

सामान्यतया, स्क्यानअघि बिरामी तथा उनीसँग आएका व्यक्तिहरूलाई पनि धातुका वस्तुहरू (गहना, घडी, मोबाइल, आदि) हटाउन अनुरोध गरिन्छ। एमआरआई कोठामा यस्तो चुम्बकीय बल हुन्छ कि ठूला फलामका सामानहरू पनि सजिलै तानिन सक्छन्। ३ टेस्ला मेसिनमा त झण्डै दराज तान्ने शक्ति हुन्छ।

यस्ता घटनाहरू पहिले पनि भएका छन्  ?
यो घटना नयाँ भने होइन। सन् २००१ मा पनि न्यूयोर्ककै एक अस्पतालमा अक्सिजन ट्याङ्की मेसिनमा तानिँदा ६ वर्षे बालकको ज्यान गएको थियो।

विशेषज्ञहरू के भन्छन् ?
रेडियोलोजी विशेषज्ञहरूको अनुसार, एमआरआई मेसिनले शरीरमा हाइड्रोजन अणुको स्पिन परिवर्तनमार्फत छवि निर्माण गर्छ। स्क्यान गर्दा धातुका वस्तुहरूले मात्र होइन, शरीरभित्रको केही इम्प्लान्ट, स्क्रू, वा औषधिका प्याचहरूले पनि जोखिम निम्त्याउन सक्छन्।

डाक्टरहरू भन्छन् – सुन शुद्ध भएमा स्क्यान गर्दा असर गर्दैन, तर मिसावट भएको चाँदी वा अन्य मिश्रधातु चुम्बकीय क्षेत्रसँग प्रतिक्रिया गर्न सक्छ।

परिवारको माग – जवाफ चाहिन्छ
मृतककी पत्नीले मेडिकल सेन्टर र प्रशासनसँग कडा प्रश्न उठाउँदै आएकी छिन्। उनी भन्छिन्, ‘मलाई स्क्यानपछि सहयोग गर्न बोलाउनु गैरकानुनी थिएन, तर त्यहाँका कर्मचारीले सुरक्षित वातावरण सुनिश्चित गर्नुपर्थ्यो।’

यो घटना स्वास्थ्य संस्थाहरूले सुरक्षा मापदण्ड कत्तिको कडाइका साथ पालना गर्नुपर्छ भन्ने कुरामा गम्भीर प्रश्न उठाउँछ। धातुजन्य वस्तुहरूको निरीक्षण, सही जानकारीको आदानप्रदान, र नियन्त्रणको कमीले यस्ता घटनाहरूले गहिरो असर पार्न सक्छ। बीबीसी