भेरी अस्पतालमा रकम रोकिँदा उपचार सेवा ठप्प हुने अवस्था

नेपाल हेल्थ न्युज, नेपालगन्ज । भेरी अस्पतालमा दुई हप्ताअघि एमआरआई सेवा एक हप्तासम्म ठप्प भयो । स्वास्थ्य सेवा विभाग र स्वास्थ्य बिमा बोर्डबाट अस्पताललाई पठाउनुपर्ने महत्वपूर्ण रकम अझै नपुगेसँगै सेवामा ठुलो असर परेको अस्पतालका मेडिकल सुपरिटेन्डेन्ट डा. निराजन सुवेदीले जानकारी दिनुभयो ।

डा. सुवेदीका अनुसार, विपन्न नागरिक उपचारका लागि छुट्याइएको तीन करोड रुपैयाँ अस्पतालले अझै पाउन सकेको छैन । त्यस्तै, स्वास्थ्य बिमा सेवाग्राहीको उपचार भत्ता स्वरूप करिब २० करोड रुपैयाँ पनि अझै आउन बाँकी छ ।

‘सप्लायर्सलाई भुक्तानी गर्न नसक्दा स्वास्थ्य सामग्री र उपकरण उपलब्ध हुन सकेका छैनन्, जसले सेवा नै ठप्प भएको हो,’ उहाँले भन्नुभयो ।

अस्पतालमा हेड इन्जरी, स्पाइनल, सिकलसेल, डायलायसिस र मुटु रोगजस्ता गम्भीर आठ प्रकारका रोगहरूको उपचारमा ठुलो समस्या देखिएको छ ।

बिमा रकम रोकिँदा ल्याब र फार्मेसी सेवा सञ्चालनमा गाह्रो भइरहेको र अस्पताल ब्रेकडाउनको अवस्थामा पुगेको बताउँदै डा. सुवेदीले भन्नुभयो, ‘अस्पतालले ६० प्रतिशत बिरामीलाई स्वास्थ्य बिमा अन्तर्गत सेवा दिइरहेको छ, तर रकम नआउँदा सेवा दिन समस्या भएको छ ।’ उहाँले थप्नुभयो, ‘यो अवस्था निरन्तर रह्यो भने बिरामी र अस्पताल दुवैका लागि ठूलो संकट हुनेछ ।’