डा. भुसालको मेडिकल रिपोर्टमा गाँजा सेवन पुष्टि, सुधार केन्द्रमा पठाइयो

नेपाल हेल्थ न्युज, काठमाडौं । माइतीघर मण्डलामा बिहीबार दिउँसो आयोजित प्रदर्शनका क्रममा पक्राउ परेका अभियान्ता निकोलस भुसाललाई सुधार केन्द्रमा पठाइएको छ।

काठमाडौं जिल्ला प्रहरी परिसरका प्रवक्ता, प्रहरी उपरीक्षक (एसपी) पवनकुमार भट्टराईका अनुसार, पक्राउपछि गरिएको स्वास्थ्य परीक्षणमा भुसालले लागूऔषध सेवन गरेको पुष्टि भएको हो।

‘एक वर्षअगाडि पनि उनलाई नियन्त्रणमा लिँदा यस्तै रिपोर्ट आएको थियो,’ एसपी भट्टराईले जानकारी दिए, ‘यसपटक पनि उस्तै देखिएको छ, त्यसैले सुधार केन्द्रमा राखिएको हो।’

उनका अनुसार, निकोलसलाई परिवारको सहमतिमा दाजुको जिम्मा लगाई सुधार केन्द्रमा पठाइएको हो। सोही प्रदर्शनका क्रममा प्रहरीले अन्य दुई जनालाई पनि नियन्त्रणमा लिएको थियो।