सरकारी विभेदको आरोप लगाउँदै कोशी प्रदेशका चिकित्सक आन्दोलित

नेपाल हेल्थ न्युज, विराटनगर । कोशी प्रदेशका चिकित्सकहरूले प्रदेश सरकारले आफूहरूमाथि विभेद गरेको आरोप लगाएका छन् । योग्य र अनुभवी प्रादेशिक चिकित्सक हुँदाहुँदै सङ्घीय सरकारअन्तर्गतका चिकित्सकलाई प्रदेशका अस्पतालमा मेसु जस्ता महत्त्वपूर्ण जिम्मेवारी दिइएको उनीहरूको गुनासो छ ।

कोशी प्रदेश प्रादेशिक चिकित्सक समूहले स्वास्थ्य मन्त्रालयमार्फत प्रदेश सरकारलाई ज्ञापनपत्र बुझाउँदै प्रदेशकै वरिष्ठ चिकित्सकलाई नेतृत्व दिनुपर्ने माग राखेको छ । माग पूरा नभए सामूहिक सेवा बहिष्कार गर्ने चेतावनी दिइएको छ ।

हाल १५ जिल्ला अस्पतालमध्ये नौ वटामा सङ्घीय चिकित्सक नेतृत्वमा छन् । प्रदेशमा ९ र १० औँ तहका विशेषज्ञ चिकित्सक उपलब्ध हुँदाहुँदै पनि उपेक्षा गरिएको समूहको दाबी छ ।

स्वास्थ्य मन्त्रालयका सचिव डा. यदुचन्द्र घिमिरेले मागलाई गम्भीर रूपमा लिँदै क्रमशः प्रदेशकै चिकित्सकलाई जिम्मेवारी दिने आश्वासन दिनुभएको छ ।