औषधि उत्पादक संघ र औषधि आयातकर्ता संघको पक्षमा फैसला

नेपाल हेल्थ न्युज, काठमाडौं । उच्च अदालतले नेपाल औषधि उत्पादक संघ र नेपाल औषधि आयातकर्ता संघको पक्षमा फैसला सुनाएको छ। संघहरूले गत भदौमा दर्ता गरेको रिटको आधारमा अदालतले बुधबार निर्णय सुनाएको हो।

अदालतमा सुनुवाई न्यायाधीश सूर्यनाथप्रकाश अधिकारी र शिवबहादुर रानाभाटको इजलासले गरेका थिए।

यसअघि औषधि तथा बिक्री प्रतिनिधि संघले उत्पादक र आयातकर्ता संघका प्रतिनिधि तथा म्यानेजर तहका कर्मचारीहरूलाई विभिन्न नियमहरू लागु गर्दै आफ्नो क्षेत्रमा प्रवेश निषेध गरेका थिए।

नियमअनुसार पाँच दिनअघि लिखित सूचना दिनुपर्ने, सिमकार्ड र टाइम कार्ड प्रयोग गर्ने, बैठक वा भेला नगर्ने, चिकित्सक वा बजारका डिस्ट्रिब्युटर्ससँग भेट नगर्ने जस्ता प्रतिबन्धहरू थिए।

उत्पादक र आयातकर्ता संघले यी प्रतिबन्ध रोक्न उच्च अदालतमा रिट दायर गरेका थिए। अदालतको आदेशपछि संघका प्रतिनिधि तथा कर्मचारीहरूले देशभर कहीं पनि काम गर्न स्वतन्त्रता पाउने छन् र औषधि तथा बिक्री प्रतिनिधि संघले उनीहरूलाई रोक्न सक्ने छैन।