गंगालालमा बीमा र विपन्न उपचारको ४० करोड रुपियाँ भुक्तानी भएन, सेवा बन्द हुने जोखिम

नेपाल हेल्थ न्युज, काठमाडौं । शहीद गंगालाल राष्ट्रिय हृदय केन्द्रमा आर्थिक अभावका कारण स्वास्थ्य बीमा अन्तर्गत सञ्चालन हुँदै आएका ओपिडी सेवा रोकिन सक्ने सम्भावना बढेको छ । ओपिडीमा आउने बिरामीहरूबाट पाउनुपर्ने स्वास्थ्य बीमा शोधभर्ना तथा विपन्न सेवा वापत्को रकम लामो समयदेखि प्राप्त नभएकाले सेवा निरन्तरता दिन कठिन हुँदै गएको केन्द्रले जनाएको छ ।

केन्द्रका कार्यकारी निर्देशक डा. रवि मल्लका अनुसार स्वास्थ्य बीमा बोर्डबाट मात्रै करिब १३ करोड रुपैयाँ भुक्तानी हुन बाँकी छ । यस्तै, विपन्न नागरिकको उपचारतर्फ २७ करोड रुपैयाँ भुक्तानी हुन बाँकी रहेको छ । यसरी बीमा र विपन्न उपचार शीर्षकमा गरेर केन्द्रले पाउनुपर्ने कुल रकम करिब ४० करोड रुपैयाँ पुगेको डा. मल्लले नेपाल हेल्थ न्युजलाई जानकारी दिनुभयो ।

लामो समयदेखि शोधभर्ना रकम नआउँदा अस्पतालको आन्तरिक स्रोतमा गम्भीर दबाब परेको र ओपिडी सेवा समेत प्रभावित हुन सक्ने अवस्था आएको केन्द्रको भनाइ छ । सम्भावित सेवा अवरोधबाट सेवाग्राहीलाई पर्न सक्ने असुविधाप्रति केन्द्रले चिन्ता व्यक्त गरेको छ ।