डब्ल्यूएचओको पीबीएसी बैठकमा नेपालको सशक्त उपस्थिति

नेपाल हेल्थ न्युज, जेनेभा । विश्व स्वास्थ्य संगठन (डब्ल्यू–एच–ओ) को कार्यकारी बोर्ड अन्तर्गतको ४३औँ कार्यक्रम, बजेट तथा प्रशासन समिति (पीबीएसी) को बैठकमा नेपालले सशक्त र प्रभावकारी सहभागिता जनाएको छ । नेपालका तर्फबाट डा. भीमप्रसाद सापकोटाले उक्त बैठकमा सक्रिय भूमिका निर्वाह गर्नुभएको हो ।

सन् २०२६ र २०२७ का लागि (पीबीएसी) सदस्यका रूपमा निर्वाचित डा. सापकोटाले सन् २०२६ जनवरी २८ देखि ३० सम्म जेनेभामा आयोजित बैठकमा समितिको सदस्यको हैसियतले ६ वटा महत्वपूर्ण एजेण्डामा नेपालको धारणा स्पष्ट रूपमा प्रस्तुत गर्नुभयो ।

बैठकका क्रममा डा. सापकोटाले विश्वव्यापी सन्दर्भमा (डब्ल्यू–एच–ओ) को ‘बिजनेस म्यानेजमेन्ट सिस्टम’ मा सुधार आवश्यक रहेको औंल्याउनुभयो । साथै सन् २०२६–२०२७ का लागि दिगो वित्तीय मोडेल विकास गर्नुपर्ने र संगठनको शासन प्रणालीलाई अझ चुस्त, पारदर्शी र प्रभावकारी बनाउनेतर्फ ध्यान दिनुपर्नेमा जोड दिनुभयो ।

उहाँले (ग्लोबल हेल्थ आर्किटेक्चर) मा सुधारको आवश्यकता औंल्याउँदै युएन पहलको महत्वसमेत उल्लेख गर्नुभयो । साथै संगठनका कार्यक्रम र मानव संसाधनलाई पुनः प्राथमिकीकरण तथा एकीकृत गर्दै उपलब्ध स्रोत र साधनको उचित र प्रभावकारी सदुपयोग गर्नुपर्ने विषयमा विशेष जोड दिनुभएको थियो ।

पीबीएसी बैठकमा नेपालको तर्फबाट प्रस्तुत गरिएका यी धारणा र सुझावहरूले विश्व स्वास्थ्य संगठनको भावी सुधार र दिगो सञ्चालनमा महत्वपूर्ण योगदान पुग्ने अपेक्षा गरिएको छ ।