काठमाडौं विश्वकै सातौँ प्रदूषित सहरमा सूचीकृत

नेपाल हेल्थ न्युज, काठमाडौं । काठमाडौं उपत्यकाको वायु प्रदूषण आज अस्वस्थ तहमा पुगेको छ। एयर क्वालिटी इन्डेक्स  एक्युआई अनुसार दिउँसो १ः२५ बजेसम्म उपत्यकाको वायु गुणस्तर १५१  एक्युआई मापन गरिएको छ।

आज बिहान काठमाडौं विश्वका सबैभन्दा प्रदूषित सहरमध्ये सातौँ स्थानमा परेको थियो भने हाल नवौँ स्थानमा छ। विश्वकै सबैभन्दा प्रदूषित सहर इजिप्टको कायरो रहेको छ, जहाँ २७३  एक्युआई मापन गरिएको छ।

वातावरण विभागका अनुसार सुक्खा मौसम, हावा नचल्नु, उद्योग–कलकारखानाको गतिविधि, विकास निर्माण तथा भारतबाट आउने सीमापार प्रदूषणका कारण वायु प्रदूषण बढेको हो। पानी नपरेसम्म प्रदूषण अझ बढ्न सक्ने चेतावनी दिइएको छ।

सरकारले फोहोर बाल्न रोक्ने, सडक सफाइ बढाउने तथा बालबालिका, ज्येष्ठ नागरिक र बिरामीलाई विशेष सावधानी अपनाउन आग्रह गरेको छ।