बिहान तातो पानी पिउनु स्वास्थ्यका लागि कति राम्रो हो?

नेपाल हेल्थ न्युज, काठमाडौं । बिहान उठ्ने बित्तिकै मनतातो पानी पिउने चलन हाल सामाजिक सञ्जालमा भाइरल भएसँगै विश्वभर नयाँ प्रयोगकर्ताहरूलाई आकर्षित गरिरहेको छ। यो चलन कुनै कडा व्यायाम तालिका वा महँगो स्किनकेअर उत्पादनमा आधारित नभई, साधारण जीवनशैली सुधारमा केन्द्रित छ।

तातो वा मनतातो पानी पिउनुका फाइदाहरू हजारौँ वर्षदेखि चीनको परम्परागत चिकित्सा र भारतको आयुर्वेदमा प्रचारित हुँदै आएका छन्। तर, अहिले टिकटक र इन्स्टाग्राममा लाखौँ भ्युज भएका भिडिओहरूले यसलाई नयाँ प्रयोगकर्तासम्म पुर्‍याएका छन्। भिडिओहरूमा प्रायः युवा वर्गलाई तातो पानी पिउँदै, तातो नास्ता खाँदै र दिनको सुरुवात तन्काएर गर्ने देखाइएको छ।

परम्परागत चिनियाँ चिकित्सा र ‘ची’

चीनमा लाखौँ मानिसहरूले अभ्यास गर्ने परम्परागत चिकित्सा प्रणाली अनुसार, शरीरभरि प्रवाहित हुने ऊर्जा ‘ची’ को प्रवाह असन्तुलित हुँदा रोग उत्पन्न हुन सक्छ। समर्थकहरू विश्वास गर्छन् कि मनतातो पानी पिउँदा यो प्रवाह सुदृढ हुन्छ र स्वास्थ्य तथा दीर्घायुमा सुधार आउँछ।

चिनियाँ चिकित्सा अनुसन्धानकर्ता प्राध्यापक शनका अनुसार, यसलाई एउटा घर जस्तै हेर्न सकिन्छ। चिसो खाना खानु भनेको घरमा चिसो हावा छिर्नुजस्तै हो। यसै सिद्धान्तले न्यानो चप्पल लगाउने र तातो नास्ता गर्ने सुझावहरूलाई पनि समर्थन गर्छ।

सामाजिक सञ्जाल र युवापुस्ताको रुचि

लन्डन बस्ने मरियमले टिकटकमा पहिलो पटक यो चलन देखेकी थिइन्। उनी भन्छिन् कि बिहानको कफीको सट्टा मनतातो पानी पिउँदा उनलाई बढी फुर्तिलो महसुस भएको छ।

विश्व स्वास्थ्य संगठनको विश्वव्यापी परम्परागत चिकित्सा केन्द्रकी अन्तरिम निर्देशक डाक्टर श्यामा कुरुविल्ला अनुसार, युवापुस्तामा परम्परागत चिकित्सा अभ्यासको अनलाइन रुचि बढ्नु व्यापक सामाजिक प्रवृत्तिको संकेत हो। यूरोप, जर्मनी र अन्य देशहरूमा गरिएको अध्ययनहरूले धेरैले परम्परागत चिकित्सा अपनाउने देखाएका छन्।

विज्ञानले के भन्छ ?
दीर्घायु चिकित्सा विशेषज्ञ डाक्टर रोजी ब्रूक्सले बताउँछिन् कि बिहान मनतातो पानी पिउँदा पाचनमा केही मद्दत पुग्न सक्छ र कब्जियत कम गर्न सहयोग पुर्‍याउन सक्छ। तर चिसो वा तातो पानीले ठूला शारीरिक फाइदा दिने वा शरीर डिटक्स गर्ने वैज्ञानिक प्रमाण छैन।

डाक्टर सेलिना ग्रे भन्छिन् कि मनतातो पानी पिउँदा मानसिक रूपमा सहयोग मिल्न सक्छ। यसले दिनको सुरुवात आफ्नै लागि समय निकाल्ने अवसर दिन्छ, जसले मानसिक स्वास्थ्यमा सकारात्मक प्रभाव पार्न सक्छ।

सन्तुलन र परामर्श जरूरी

कुरुविल्ला भन्छिन् कि परम्परागत चिकित्सा अपनाउँदा आफ्नो स्वास्थ्य अवस्थाअनुसार चिकित्सकसँग परामर्श गर्न आवश्यक छ। विश्व स्वास्थ्य संगठनले तातो पानी पिउनका लागि कुनै विशेष निर्देशन दिएको छैन। “सबै कुरा प्रमाण र सन्तुलनमा आधारित हुनुपर्छ,” उनी जोड दिन्छिन्।