राष्ट्रिय प्रत्यारोपण केन्द्रमा ६ महिनामा १०० मिर्गौला प्रत्यारोपण

नेपाल हेल्थ न्युज, काठमाडौं । भक्तपुरमा रहेको शहीद धर्मभक्त राष्ट्रिय प्रत्यारोपण केन्द्रमा पछिल्लो ६ महिनामा १०० जनामा मिर्गौला प्रत्यारोपण सफलतापूर्वक सम्पन्न गरिएको छ।

केन्द्रका अनुसार  डा. कल्पना कुमारी श्रेष्ठ कार्यकारी निर्देशक केन्द्रमा आएपछि प्रत्यारोपण सेवामा उल्लेखनीय वृद्धि भएको हो। कार्यकारी निर्देशकको जिम्मेवारी सम्हालेपछि सेवा विस्तार र व्यवस्थापनमा सुधार हुँदै गएको बताइएको छ।

मिर्गौला प्रत्यारोपण सर्जनका अनुसार हाल केन्द्रमा नियमित रूपमा हप्तामा ४ देखि ६ जनासम्म बिरामीको प्रत्यारोपण भइरहेको छ। सीमित स्रोतसाधन हुँदाहुँदै पनि सेवाको निरन्तरता कायम राखिएको उल्लेख गरिएको छ।

स्थापनाको १३ वर्षको अवधिमा केन्द्रले अहिलेसम्म १६०६ जनाको मिर्गौला प्रत्यारोपण र केही कलेजो प्रत्यारोपणसमेत सम्पन्न गरिसकेको छ। देशभर हुने मिर्गौला प्रत्यारोपणमध्ये ठूलो हिस्सा यही केन्द्रमा हुने गरेको जनाइएको छ।

आगामी आर्थिक वर्षको अन्त्यसम्ममा थप २०० जनामा मिर्गौला प्रत्यारोपण गर्ने लक्ष्य केन्द्रले लिएको छ। यसले सेवा विस्तार र बिरामीको पहुँच बढाउने अपेक्षा गरिएको छ।

लामो समयसम्म नेतृत्व सम्हालेका पूर्व प्रमुखको अवकाशपछि नयाँ नेतृत्व आएको हो। केन्द्र स्थापना कालदेखि नै आबद्ध रहेकी अनुभवी चिकित्सकले अहिले व्यवस्थापनको जिम्मेवारी सम्हालिरहेकी छन्।

स्वास्थ्य सेवाको क्षेत्रमा केन्द्रले निरन्तर प्रगति गर्दै गएको र प्रत्यारोपण सेवामा देशकै प्रमुख संस्थाको रूपमा स्थापित हुँदै गएको देखिन्छ।