२४८ जना नर्सका लागि रोजगारीको अवसर

नेपाल हेल्थ न्युज, हेटौंडा । बागमती प्रदेश सरकार स्वास्थ्य मन्त्रालय अन्तर्गत स्वास्थ्य निर्देशनालयले “एक विद्यालय एक नर्स कार्यक्रम” का लागि २४८ जना विद्यालय नर्स करार सेवामा भर्ना गर्न दरखास्त आह्वान गरेको छ ।

निर्देशनालयले चालु आर्थिक वर्ष २०८२/८३ को स्वीकृत वार्षिक कार्यक्रमअनुसार बागमती प्रदेशका विभिन्न माध्यमिक विद्यालयहरूमा कार्य गर्ने गरी पाँचौं तहका विद्यालय नर्स पदमा आवेदन माग गरेको हो ।

प्रकाशित सूचनाअनुसार मान्यता प्राप्त शिक्षण संस्थाबाट नर्सिङ विषयमा कम्तीमा प्रवीणता प्रमाणपत्र तह (पिसिएल नर्सिङ) वा सो सरह उत्तीर्ण गरेका इच्छुक उम्मेदवारले आवेदन दिन सक्नेछन् ।

उम्मेदवार छनोट लिखित परीक्षा र अन्तर्वार्तामार्फत गरिने जनाइएको छ । आवेदन फाराम बागमती प्रदेशअन्तर्गतका जिल्लास्थित जनस्वास्थ्य कार्यालयहरूमा बुझाउनुपर्नेछ ।

दरखास्त दिने अवधि २०८३ जेठ १४ गतेदेखि जेठ २८ गतेसम्म कार्यालय समयभित्र तोकिएको छ । स्वास्थ्य निर्देशनालयले विस्तृत जानकारी स्वास्थ्य निर्देशनालय, स्वास्थ्य मन्त्रालय तथा सम्बन्धित जनस्वास्थ्य कार्यालयहरूको वेबसाइटमा उपलब्ध रहेको जनाएको छ । साथै, एक उम्मेदवारले एक स्थानीय तहमा मात्र आवेदन दिन पाउने व्यवस्था गरिएको सूचनामा उल्लेख छ ।