भाइरल ज्वरो र मौसमी रुघाखोकी कसरी बच्ने ? 

नेपाल हेल्थ न्युज, काठमाडौं । पछिल्ला केही दिनयता नेपालमा भाइरल ज्वरो तथा मौसमी रुघाखोकीका बिरामी बढ्न थालेका छन्। ज्वरो आउने, टाउको दुख्ने, शरीर तथा मांसपेशी दुख्ने, नाकबाट पानी बग्ने, हाच्छ्युँ आउने र खोकी लाग्नेजस्ता समस्या लिएर स्वास्थ्य संस्थामा पुग्ने बिरामीको संख्या बढिरहेको चिकित्सकहरूले बताएका छन्।

स्वास्थ्य विज्ञहरूका अनुसार मौसमी रुघाखोकीमा प्रायः नाक बन्द हुने, हाच्छ्युँ आउने, घाँटी खसखस हुने र सामान्य ज्वरो देखिन्छ। भाइरल ज्वरोमा भने अचानक उच्च ज्वरो, टाउको दुख्ने, शरीर तथा जोर्नी दुख्ने र अत्यधिक कमजोरी हुनेजस्ता लक्षण देखिन सक्छन्।

संक्रमणबाट बच्न नियमित रूपमा साबुनपानीले हात धुने, भीडभाडमा सावधानी अपनाउने, खोक्दा वा हाच्छ्युँ गर्दा नाक–मुख छोप्ने तथा बिरामी व्यक्तिसँग नजिकको सम्पर्क कम गर्ने चिकित्सकहरूको सुझाव छ। पर्याप्त पानी तथा झोलिलो पदार्थ सेवन गर्ने, पौष्टिक खाना खाने र पर्याप्त आराम गर्न पनि उनीहरूले आग्रह गरेका छन्।

चिकित्सकहरूले ज्वरो वा रुघाखोकी लाग्दैमा आफैंले एन्टिबायोटिक सेवन नगर्न सुझाव दिएका छन्। सामान्य भाइरल संक्रमण केही दिनमा सुधार हुन सक्छ, तर लगातार उच्च ज्वरो रहिरहेमा, सास फेर्न गाह्रो भएमा, छाती दुखेमा वा अत्यधिक कमजोरी देखिएमा तत्काल स्वास्थ्य संस्थामा सम्पर्क गर्नुपर्ने उनीहरूको भनाइ छ।

स्वास्थ्यकर्मीहरूले मौसम परिवर्तनको समयमा बालबालिका, ज्येष्ठ नागरिक तथा दीर्घरोग भएका व्यक्तिले विशेष सावधानी अपनाउनुपर्ने बताएका छन्।