विपन्न नागरिकको उपचारबापत ११५ अस्पताललाई २७ करोड सोधभर्ना

नेपाल हेल्थ न्युज, काठमाडौं । स्वास्थ्य बीमा बोर्डले विपन्न नागरिक औषधि उपचार कार्यक्रमअन्तर्गत ११५ वटा सेवा प्रदायक अस्पताललाई गत असार महिनाको उपचार खर्चबापत २७ करोड रुपैयाँभन्दा बढी सोधभर्ना गरेको छ ।

बोर्डका अनुसार डायलासिस, मुटुरोग, हेड इन्जुरी, स्पाइनल इन्जुरी, क्यान्सरलगायत रोगको उपचारबापत सेवा प्रदायक स्वास्थ्य संस्थालाई २७ करोड १४ लाख २२ हजार ११७ रुपैयाँ १८ पैसा सोधभर्ना गरिएको हो ।

बोर्डको गत भदौ ५ गतेको निर्णयअनुसार सेवा प्रदायक अस्पतालबाट प्राप्त कागजातको परीक्षण तथा दाबी यकिन गरी स्वीकृत भएको रकम सम्बन्धित स्वास्थ्य संस्थाको बैंक खातामा पठाइएको हो ।

विपन्न नागरिकलाई कडा रोगको उपचारका लागि दिइने औषधि उपचार खर्च सोधभर्ना गर्ने जिम्मेवारी यसअघि स्वास्थ्य सेवा विभागको उपचारात्मक सेवा महाशाखाले सम्हाल्दै आएको थियो । पछिल्लो समय उक्त जिम्मेवारी स्वास्थ्य बीमा बोर्डले सम्हाल्दै आएको छ ।
आर्थिक तथा जनशक्ति अभावका कारण लामो समयदेखि दाबी भुक्तानी तथा सोधभर्ना प्रक्रियामा समस्या झेल्दै आएको बोर्डले पछिल्लो समय बक्यौता रकम फरफारक गर्न थालेको जनाएको छ ।

बोर्डका प्रवक्ता डा. पवन शाहका अनुसार स्वास्थ्य बीमा सेवा उपलब्ध गराएका स्वास्थ्य संस्थाको फागुनसम्मको हिसाब क्लियर भइसकेको छ । बाँकी पाँच महिनाको रकम पनि छिट्टै सोधभर्ना गर्ने गरी काम अघि बढाइएको उनले बताए ।

‘पहिले रकम पनि थिएन, दाबी भुक्तानीको परीक्षण गर्ने जनशक्ति पनि थिएन । अहिले हामीकहाँ करिब ५५ जना जनशक्तिले दैनिक दाबी भुक्तानीको परीक्षण गरिरहेका छन्,’ उनले भने, ‘सरकारले बजेट पनि १५ अर्ब रुपैयाँ छुट्याएको अवस्था छ । यसले सोधभर्नाका लागि केही सहज हुनेछ । डिजिटल सिस्टममा समेत धेरै सुधार आइरहेकोले कामहरू सजिलो हुँदै गएको छ ।’

स्वास्थ्य बीमा कार्यक्रम २०७२ चैत २५ गते कैलालीबाट सुरु भएको थियो । अहिले यो कार्यक्रम देशभर विस्तार भइसकेको छ । यद्यपि स्वास्थ्य बीमा सेवाको प्रभावकारिता, सेवा प्राप्तिमा हुने ढिलाइ तथा अन्य विषयमा नागरिकका गुनासा भने अझै कायमै छन् ।