राजधानीका तीन अस्पतालमा ५५ घाइतेको उपचार हुँदै, शिक्षण अस्पतालमा एकको मृत्यु

नेपाल हेल्थ न्युज, काठमाडौं। चीनतर्फबाट आएको बाढीको घटनामा परी घाइते भएका ५५ जनाको काठमाडौंका तीन प्रमुख अस्पतालमा उपचार भइरहेको छ। उपचारका क्रममा त्रिवि शिक्षण अस्पतालमा एक जना घाइतेको मृत्यु भएको छ।

सम्बन्धित अस्पतालबाट प्राप्त पछिल्लो विवरणअनुसार काठमाडौंको ट्रमा सेन्टरमा २१ जना, त्रिवि शिक्षण अस्पतालमा ३१ जना र वीर अस्पतालमा ३ जना घाइते उपचाररत छन्।

त्रिवि शिक्षण अस्पतालमा उपचाररत कुशल मगरको उपचारका क्रममा मृत्यु भएको अस्पतालले जनाएको छ। मगरको ठेगाना भने अस्पतालले खुलाएको छैन।

बाढीको घटनामा परी घाइते भएकाहरूको अवस्था र उपचारबारे अस्पतालहरूले आवश्यक व्यवस्थापन गरिरहेका छन्। घाइतेहरूको निःशुल्क उपचारका लागि अस्पतालमा आवश्यक जनशक्ति परिचालन गर्नुका साथै अन्य आवश्यक प्रबन्ध मिलाइएको सम्बन्धित अस्पतालहरूले जनाएका छन्।