नर्भिकले ४२ दशमलब १०५ प्रतिशत लाभांश वितरण गर्ने  

नेपाल हेल्थ न्युज, काठमाडौं । नर्भिक इन्टरनेशनल हस्पिटल एण्ड मेडिकल कलेज लिमिटेडले ४२ दशमलब १०५ प्रतिशत लाभांश वितरण गर्ने निर्णय गरेको छ ।

नर्भिकको भदौं २६ गते शुक्रबार आयोजित छैटौं वार्षिक साधारणसभाले आर्थिक वर्ष २०८२÷८३ को मुनाफाबाट २० प्रतिशत बोनस सेयर तथा २२ दशमलब १०५ प्रतिशत नगद लाभांश (कर प्रयोजन समेत)   वितरण गर्ने निर्णय गरेको हो ।

उक्त साधारणसभाले २० प्रतिशत बोनस सेयर वितरण पश्चात कायम हुने चुक्ता पुजीँको २० प्रतिशत बराबरको शेयर बुक बिल्डिङ प्रक्रियाबाट सर्वसाधारणका लागि शेयर निस्किाष्न गर्ने तथा उक्त प्रक्रियाका लागि संस्थागत लगानीकर्ताहरुलाई वितरण गरिने विवरण पत्र स्वीकृत गर्ने लगायत काम कारबाहीको अख्तियारी संचालक समितिलाई प्रदान गर्ने निर्णय पनि गरेको छ ।

आर्थिक वर्ष २०८२÷८३ मा अस्पतालको कुल आम्दानी फार्मेसी बाहेक रु.२ अर्ब ८३ करोड, कुल खर्च रु.२ अर्ब ३६ करोड तथा खुद नाफा रु.४७ करोड भन्दा माथि रहेको वार्षिक प्रतिवेदनमा उल्लेख गरिएको छ । यस्तै फार्मेसी सहित कुल आम्दानी रु ३ अर्ब  ४७ करोड, कुल खर्च रु २ अर्ब ९९ करोड तथा खुद नाफा रु ४७ करोड ८५ लाख भन्दा माथि रहेको जनाएको छ ।

हस्पिटलको वार्षिक प्रतिवेदन अनुसार नर्भिकले २०८२÷८३ मा ओपिडि तर्फ एकलाख ७९ हजार, आइपिडि तर्फ ९ हजार र आकस्मिक तर्फ ६ हजारजना बिरामीलाई उपचार सेवा प्रदान गरेको छ । यस्तै ४१ हजार सेवाग्राहीलाई  अस्ट्रेलिया, युके, जापान, न्युजिल्यान्ड तथा पपुवा न्युगिनियाका लागि इमिग्रेसन हेल्थ स्क्रिनिङ सेवा प्रदान गरेको छ ।