आगामी वैशाख १ गतेदेखि लिनायक मेसिनबाट उपचार सुरु गरिने समितिले जनाएको छ । उक्त मेसिन क्यान्सर उपचारमा अहिलेसम्म प्रयोगमा आएको इन्टेनसिटी मोडुलेटेड रेडियसन थेरापी (आईएमआरटी) एवं थ्रीडी–सीआरटी प्रविधिको भएको चिकित्सकको भनाइ छ । ‘लिनायक मेसिनले बिरामीलाई जहाँ क्यान्सर लागेर विकीरण दिनुपर्ने हो, त्यहीं ठाउँमा रेडियोथेरापीमार्फत विकिरण दिने काम गर्छ,’ अस्पतालको रेडियोथेरापी विभागकी रेडियसन अन्कोलोजिस्ट डा. श्वेता बरालले भनिन्, ‘क्यान्सर लागेको कोषिकालाई सेकेर मार्न यो मेसिन अति प्रभावकारी छ ।’