उपचारका लागि काठमाडौं ल्याइँदै गरेकी महिलाको निधन

नेपाल हेल्थ न्युज, काठमाडौं । रौतहट जिल्ला अन्तर्गत फतुवा विजयपुर नगरपालिका–११ की ३९ वर्षीया राजकुमारी चौधरीको स्वास्थ्य अवस्था बिग्रिएपछि थप उपचारका लागि काठमाडौं ल्याउने क्रममा उनको मृत्यु भएको छ।

परिवारका अनुसार राजकुमारीलाई वायुसेवा मार्फत सिमरा विमानस्थलबाट काठमाडौं लैजाँदै गर्दा जहाजमै अचेत भएकी थिइन्। उनका श्रीमान् जंग बहादुर चौधरी पनि सोही यात्रामा सँगै थिए।

जिल्ला प्रहरी परिसर काठमाडौंका प्रवक्ता एसपी अपीलराज बोहराले जानकारी दिएअनुसार अचेत अवस्थामा केएमसी अस्पताल पुर्‍याइएकी राजकुमारीलाई चिकित्सकले अस्पताल पुग्नुअघि नै मृत्यु भइसकेको घोषणा गरेका थिए।

हाल घटनाबारे थप अनुसन्धान भइरहेको प्रहरीले जनाएको छ। शव पोष्टमार्टमका लागि त्रिभुवन विश्वविद्यालय शिक्षण अस्पताल, महाराजगञ्ज लगिएको छ।