अस्पतालमा दरबन्दीभन्दा पाँच गुणा बढी कर्मचारीःबढ्दो बिरामी चापले कार्यभार चुलियो

नेपाल हेल्थ न्युज, तुलसीपुर । दाङको तुलसीपुरस्थित राप्ती प्रादेशिक अस्पतालले ५० शय्याको मात्र अनुमति भए पनि बिरामी चाप बढेसँगै १४४ शय्या सञ्चालनमा ल्याइएको छ। अस्पतालका निमित्त मेडिकल सुपरिटेन्डेन्ट डा. पदमराज अधिकारीका अनुसार सीमित संरचना र जनशक्ति हुँदाहुँदै पनि बढ्दो सेवाको मागले अस्पतालमा भार परेको छ।

हाल १४ कन्सलटेन्ट डाक्टरको दरबन्दीमा १८ जना कार्यरत छन् भने ७ मेडिकल अफिसरको दरबन्दीमा २४ जना कार्यरत छन्। ७२ जनाको दरबन्दीमा २३५ कर्मचारी परिचालन गरिएको छ।

अस्पताल विकास समितिका अध्यक्ष महेन्द्रराज लामिछानेले २०० शय्याको स्वीकृति र बजेट आगामी आर्थिक वर्षमा आउनेमा आशावादी रहेको बताउनुभयो। चौतर्फी मागका बीच अस्पताललाई २०० शय्यामा विस्तार गर्न पहल भइरहेको जानकारी दिनुभयो ।