भक्तपुर क्यान्सर अस्पतालको कार्यकारी निर्देशकमा डा. उज्वल चालिसे नियुक्त

नेपाल हेल्थ न्युज, भक्तपुर । सरकारले भक्तपुर क्यान्सर अस्पतालको कार्यकारी निर्देशकमा डा. उज्वल चालिसेलाई नियुक्त गरेको छ ।

१२ असार २०८२ मा बसेको मन्त्रिपरिषद्को बैठकले अस्पतालका निमित्त निर्देशक रहेका चालिसेलाई कार्यकारी निर्देशकका रूपमा चार वर्षका लागि नियुक्त गर्ने निर्णय गरेको हो ।

यो निर्णयसँगै डा.चालिसेले अब औपचारिक रूपमा अस्पतालको प्रमुख कार्यकारी जिम्मेवारी सम्हाल्ने भएका छन् । उहाँ अस्पतालमा विगत केही समयदेखि आर्थिक तथा प्रशासनिक अधिकारसहित निमित्त निर्देशकका रूपमा कार्यरत हुनुहुन्थ्यो । यस बीचमा उहाँले अस्पतालमा सेवा सुधार, भौतिक पूर्वाधार विस्तार, जनशक्ति व्यवस्थापन र सामाजिक उत्तरदायित्वका क्षेत्रमा उल्लेखनीय प्रगति गर्नुभएको थियो ।

डा. चालिसेको पृष्ठभूमी
डा.उज्वल चालिसे रेडिएसन अन्कोलोजीका विशेषज्ञ हुनुहुन्छ। उहाँ लामो समयदेखि क्यान्सर उपचार र अनुसन्धानमा समर्पित हुनुहुन्छ । भक्तपुर क्यान्सर अस्पतालमै कार्यरत रहँदै उहाँले क्लिनिकल नेतृत्व, प्रशासनिक दक्षता र संस्थागत सुधारको समायोजन गरेर अस्पतालको सेवा स्तरमा उल्लेखनीय परिवर्तन ल्याउन ल्याउन थाल्नुभएको छ ।  

उहाँ हाल कन्सल्यान्ट रेडिएसन अंकोलोजिष्टको रूपमा समेत काम गरिरहनुभएको छ । चिकित्सकीय जिम्मेवारीसँगै व्यवस्थापन क्षमतामा समेत अब्बल मानिने डा. चालिसे सजग योजनाकार र दिगो सुधारको राम्रो व्यक्तिको रुपमा मानिनुहुन्छ ।

सुधारका संकेत—निमित्त निर्देशककालको उपलब्धि
निमित्त निर्देशकका रूपमा कार्यरत हुँदा डा. चालिसेले केही महत्वपूर्ण सुधारात्मक कदमहरू चाल्नुभएको छ ।  जुन यस प्रकार छन् । 
सामाजिक सुरक्षा कोषसँग सेवा सम्झौता
डा. चालिसेको पहलमा अस्पतालले सामाजिक सुरक्षा कोषसँग सम्झौता ग¥यो । जसअनुसार कोषमा आबद्ध लाभग्राहीहरूले क्यान्सर सम्बन्धी सम्पूर्ण सेवा केवल २०% शुल्क तिरेर पाउन थालेका छन् । यसले गरीब तथा श्रमिक वर्गलाई प्रत्यक्ष राहत मिलेको छ ।

अस्पतालमा प्रशासनिक पारदर्शिता र कार्यदक्षता सुधार
कर्मचारी मूल्यांकन प्रणाली, हाजिरी अनुगमन, सेवा शुल्क एकरुपीकरण लगायतका सुधारात्मक कदम चालिएको छ ।

सेवा विस्तार र दक्ष जनशक्ति समायोजन
रेडिएसन थेरापी, केमोथेरापी, क्लिनिकल अन्कोलोजी, नर्सिङ र फिजियोथेरापी लगायतका सेवा एकाइहरूलाई समन्वयात्मक ढंगले अघि बढाइएको छ । 
‘क्यान्सर बिजेता’ कार्यक्रमको थालनी
उपचारपछि निको भएका बिरामीहरूको सम्मान, प्रेरणा र मनोबल अभिवृद्धिका लागि ‘क्यान्सर बिजेता’ कार्यक्रम सुरु गरिएको छ । यसले बिरामी मात्र होइन, चिकित्सक र कर्मचारीबीचको आत्मीय सम्बन्ध बलियो बनाएको छ ।

अस्पतालको समग्र अवस्था सुधार गर्ने लक्ष्य
डा. चालिसेले कार्यकारी निर्देशकका रूपमा कार्यभार सम्हालेपछि भक्तपुर क्यान्सर अस्पतालको चिकित्सकीय सेवा, भौतिक पूर्वाधार र अनुसन्धान कार्यमा दीर्घकालीन सुधार ल्याउने लक्ष्य लिएका लिनुभएको छ ।

उहाँ भन्नुहुन्छ—

“नेपालमा क्यान्सरको उपचार अझै धेरै मानिसको पहुँचबाहिर छ । हामी यहाँबाट किफायती र गुणस्तरीय सेवा प्रवाह गर्ने मोडेल स्थापना गर्दैछौं । अस्पताललाई सेवा, शिक्षा र अनुसन्धानको केन्द्र बनाउने मेरो योजनामा सरकार, कर्मचारी र जनताको साथ आवश्यक छ ।”

दूरगामी सोचः स्थानीय अभिप्रेरणा
भक्तपुर क्यान्सर अस्पताल क्यान्सरको उपचारमा समर्पित नेपालकै प्रमुख संस्थाहरूमध्ये एक हो । यतिबेला यो अस्पतालले देशभरका हजारौं क्यान्सर पीडितलाई सेवा दिइरहेको छ ।

अस्पतालको सेवा अझ विस्तार गर्नका लागि डा. चालिसेले केही महत्वपूर्ण योजनाहरू अघि सानुभएको छ जस्तै—

• आधुनिक रेडिएसन उपकरण थप्ने
• डिजिटल स्वास्थ्य प्रविधिको प्रयोग
• डाटाबेस निर्माण र क्यान्सर रजिस्ट्रेशनको एकीकरण
• नेशनल क्यान्सर पोलिसीसँग अस्पतालको समन्वय
• स्वदेशी विशेषज्ञ उत्पादनमा जोड

बिरामीमैत्री सेवा–चालिसेको प्राथमिकता
डा. चालिसेले आफ्नो नेतृत्वमा बिरामीमैत्री सेवा संस्कृति विकास गर्न चाहनुहुन्छ । बिरामीको सहजता, सस्तो उपचार, मनोवैज्ञानिक परामर्श, परियोजना व्यवस्थापन र मूल्यमा पारदर्शिता उहाँका प्रमुख प्राथमिकता हुन् ।

उहाँको भनाइ छ—

“क्यान्सरको उपचार केवल औषधि वा सर्जरी होइन, बिरामीप्रति करुणा, विश्वास र समर्पण हो । अस्पतालले यस दृष्टिकोणमा काम गर्नुपर्नेछ ।”
अतः डा. उज्वल चालिसेको कार्यकारी निर्देशक पदमा नियुक्ति भक्तपुर क्यान्सर अस्पताल मात्र होइन, सम्पूर्ण नेपाली क्यान्सर उपचार सेवाका लागि उत्साहजनक समाचार हो । व्यावसायिक दक्षता, नेतृत्व क्षमता र मानवीय दृष्टिकोण भएका डा. चालिसे जस्ता व्यक्तित्वको नेतृत्वमा अस्पतालले गुणस्तरीय सेवा, वैज्ञानिक अनुसन्धान र सामाजिक जवाफदेहिताको नयाँ युगमा प्रवेश गर्ने आशा गरिएको छ ।