स्वास्थ्यकर्मी मृत अवस्थामा फेला

नेपाल हेल्थ न्युज, बैतडी । सुदूरपश्चिमको बैतडी जिल्लाको पुर्चौडी नगरपालिका–१० स्थित विजयपुर स्वास्थ्यचौकीमा कार्यरत एक २४ वर्षीया अनमी (सहायक नर्स मिडवाइफ) मृत भेटिएकी छिन्।

भागरथी कुँवर नामकी ती स्वास्थ्यकर्मी आइतबार साँझ आफ्नै कोठामा झुण्डिएको अवस्थामा फेला परेकी हुन्। कार्यस्थल टाढा भएका कारण उनी स्थानीय रूपमा कोठा भाडामा लिएर बस्दै आएकी थिइन्।

गत वैशाखमा वैवाहिक जीवनमा बाँधिएकी भागरथीका श्रीमान नेपाली सेनामा कार्यरत छन्। समुदायमा स्वास्थ्य सेवा पुर्‍याउँदै आएकी ती युवतीको यसरी भएको मृत्युले स्थानीयवासीहरू स्तब्ध भएका छन्।

घटना थाहा पाएपछि इलाका प्रहरी कार्यालय पाटनबाट प्रहरी निरीक्षक राजेन्द्र साउँदको नेतृत्वमा टोली घटनास्थलमा पुगेको थियो। जिल्ला प्रहरी कार्यालय बैतडीका प्रवक्ता प्रहरी निरीक्षक बलराम पाण्डेयका अनुसार घटनाको विस्तृत अनुसन्धान भइरहेको छ।