१४५ जना क्षयरोगी पहिचान

नेपाल हेल्थ न्युज, बर्दीबास । बर्दीबास नगरपालिकाका अधिकांश वडामा क्षयरोगका बिरामी फेला परेका छन् । पछिल्लो एक वर्षको अवधिमा नगरपालिकाभित्र १४५ जना क्षयरोगी पहिचान गरिएको नगर स्वास्थ्य शाखाले जनाएको छ । तीमध्ये सबैभन्दा बढी वडा नं. ८ को हात्तीलेट क्षेत्रमा मात्र २२ जना संक्रमित भेटिएपछि स्थानीय तहमा चिन्ता थपिएको छ ।

नेपाल सरकारको सन् २०५० सम्म मुलुकलाई क्षयरोगमुक्त बनाउने लक्ष्यलाई साथ दिँदै गाउँ-गाउँमा खटिएको स्वास्थ्य टोलीले बिरामी पहिचानसँगै औषधि वितरणको कार्य अघि बढाएको छ । हात्तीलेट स्वास्थ्य चौकीमा हालै सम्पन्न विशेष शिविरमा बागमती सेवा समाज र महोत्तरी क्षयरोग टिमको सहकार्यमा अत्याधुनिक प्रविधिबाट परीक्षण गरियो ।

शिविरमा १२३ जनाको सामूहिक परीक्षण (स्क्रिनिङ) गर्दा २८ जनामा क्षयरोगको आशंका देखिएको र तीमध्ये १४ जनाको अवस्था गम्भीर रहेको स्वास्थ्य शाखा प्रमुख रामबाबु यादवले जानकारी दिनुभयो।

परीक्षण गरिएका बिरामीको खकार संकलन गरी थप परीक्षणका लागि गौशालास्थित प्राथमिक स्वास्थ्य केन्द्रमा पठाइएको छ, यादवले बताउनुभयो ।

वडाध्यक्ष शमशेरसिंह लामाले हात्तीलेट क्षेत्रको सामाजिक र आर्थिक अवस्था क्षयरोगको फैलावटको प्रमुख कारक भएको बताउनुभयो । उहाँका अनुसार यहाँ करिब १,४०० परिवार बसोबास गर्छन्, जसमा दलित र विपन्न समुदायको उपस्थिति उल्लेखनीय छ । स्वास्थ्य शिक्षा अभाव, अस्वस्थकर बानी र न्यून पोषणका कारण रोग फैलन सहज भएको हो, वडाध्यक्ष लामाको भनाइ छ ।

शिविरमा आशंकास्पद भेटिएका २८ मध्ये २४ जना दलित तथा जनजाति समुदायका हुन् । यसले समुदाय(आधारित स्वास्थ्य सचेतनाको खाँचो औंल्याएको छ ।

वडा नं. ७ र ११ मा क्षयरोगका कारण तीन जनाको मृत्यु भइसकेको तथ्यले पनि अवस्था गम्भीर रहेको संकेत गर्छ । नगरप्रमुख प्रह्लाद क्षेत्रीले समुदायमै पुगेर गरिने यस्ता शिविरहरूले समयमै रोगको पहिचान र उपचारको बाटो खोल्ने भएकाले क्षयरोग नियन्त्रणमा सकारात्मक प्रभाव पार्ने विश्वास व्यक्त गर्नुभयो ।