भक्तपुर क्यान्सर अस्पतालमा विद्युतीय आईसीयू बेड हस्तान्तरण

नेपाल हेल्थ न्युज, काठमाडौं। बालक्यान्सर उपचार सेवामा पहुँच र गुणस्तर सुधार्ने उद्देश्यका साथ रमेश गुप्ता मेमोरियल ट्रस्टले महालक्ष्मी डेभलपमेन्ट बैंकको सहयोगमा भक्तपुर क्यान्सर अस्पताललाई नयाँ विद्युतीय आईसीयू बेड हस्तान्तरण गरेको छ।

यस सहयोगसँगै अस्पतालको बालक्यान्सर उपचार सेवा अझ प्रभावकारी हुने अपेक्षा गरिएको छ। यसअघि १० बेड रहेको आईसीयू क्षमता अब १५ बेड पुगेको जनाइएको छ।

ट्रस्टले विश्वव्यापी संस्था ‘वर्ल्ड चाइल्ड क्यान्सर’को सहयोगमा नेपालका सातै प्रदेशमा स्थापना गरिएका साझा उपचार केन्द्रहरूलाई आवश्यक उपकरण र सहयोग उपलब्ध गराउँदै आएको छ।

यी केन्द्रहरूले स्थानीय स्तरमै बालबालिकालाई उपचार सुविधा प्रदान गर्दै आएका छन्, जसले लामो दूरी यात्रा गर्नुपर्ने बाध्यता कम गर्ने तथा परिवारमा पर्ने आर्थिक र मानसिक भार घटाउने विश्वास व्यक्त गरिएको छ।