स्वास्थ्य बीमालाई व्यवस्थित बनाउने तयारीमा छौं : स्वास्थ्यमन्त्री

नेपाल हेल्थ न्युज, काठमाडौं । स्वास्थ्य मन्त्री निशा मेहताले स्वास्थ्य बीमामा देखिएका समस्या हटाएर यसलाई सरल र जनमैत्री बनाउन कार्य योजना तयार पारिरहेको बताएकी छन्।

सोमबार वीर अस्पतालमा ‘राष्ट्रिय सरसफाइ सप्ताह’ को उद्घाटन समारोहमा मन्त्री मेहताले स्वास्थ्य बीमामा केही पेचिलो पक्ष रहेको स्वीकार्दै, त्यसलाई कसरी सहज र प्रभावकारी बनाउन सकिन्छ भन्ने विषयमा मन्त्रालयमा गहन अध्ययन भइरहेको जानकारी दिइन्।

उनका अनुसार स्वास्थ्य बीमा सुधारसम्बन्धी कार्य योजना अन्तिम चरणमा पुगेको छ र चाँडै नागरिकका लागि उपयोगी नयाँ व्यवस्था सार्वजनिक गरिनेछ। उनले भनिन्  “हामी स्वास्थ्य बीमालाई कसरी सरल र जनमैत्री बनाउन सक्छौँ भन्ने विषयमा छलफल गरिरहेका छौँ। प्रक्रिया अन्तिम चरणमा छ र छिट्टै यसको जानकारी जनता माझ पुर्‍याउनेछौँ।”