स्वास्थ्य सचिव नियुक्ति विवादमा सर्बोच्च अदालतको आदेशः निर्णय फाइल झिकाउने

नेपाल हेल्थ न्युज, काठमाडौँ । सर्बोच्च अदालतले स्वास्थ्य सचिव नियुक्ति प्रक्रिया सम्बन्धि निर्णय फाइल झिकाउने आदेश गरेको छ ।

अतिरिक्त स्वास्थ्य सचिव डा.संगीता कौशल मिश्राको रिटमा सुनुवाई गर्दै न्यायाधीशद्धय तिलप्रसाद श्रेष्ठ र महेश शर्मा पौडेलको इजलासले निर्णय फाइल झिकाउने आदेश गरेको हो ।

सो रिटमा गत ३ चैतमा प्रारम्भिक सुनुवाई गर्दै न्यायाधीश बालकृष्ण ढकालले सरकारका नाममा कारण देखाउ आदेश गर्दै अन्तरिम आदेशका विषयमा छलफल गर्न आजका लागि पेशी तोक्नुभएको थियो । मिश्रा सरकारी निर्णयबिरुद्ध गत चैत १ गते सर्बोच्च अदालत जानुभएको थियो । गत २१ मा बसेको मन्त्रिपरिषद्को बैठकले डा विकास देवकोटालाई स्वास्थ्य सचिवमा नियुक्त गर्ने निर्णय गरेको थियो । रिटमा प्रधानमन्त्री तथा मन्त्रिपरिषद्को कार्यालय सिंहदरबार, स्वास्थ्य तथा जनसंख्या मन्त्रालय रामशाहपथ, स्वास्थ्य मन्त्री, बढुवा समिति र नयाँ स्वास्थ्य सचिव डा विकास देवकोटालाई विपक्षी बनाइएको छ ।