नेपालमा ४० प्रतिशत क्षयरोगी उपचारको पहुँच बाहिर 

नेपाल हेल्थ न्युज, भक्तपुर। नेपालमा ४० प्रतिशत क्षयरोगीहरु उपचारको पहुँचबाहिर रहेको राष्ट्रिय क्षयरोग नियन्त्रण केन्द्रले जानकारी दिएको छ ।

केन्द्रद्धारा आज भक्तपुरमा पत्रकारसँगको अन्तरक्रियामा  केन्द्रका  निर्देशक डा.श्रीराम तिवारीले ४० प्रतिशत क्षयरोगीहरु ग्रामीण समुदायमा उपचारको पहुँच बाहिर रहेको बताउनुभयो ।   क्षयरोगको उपचार ९२ प्रतिशत सफल हुने गरेको बताउँदै निर्देशक तिवारीले  उपचारमा आउने करिब ७२ प्रतिशतमा फोक्सोको क्षयरोग हुने गरेको स्पष्ट पार्नुभयो । शरीरका अन्य अंगमा २८ प्रतिशत क्षयरोग हुने गरेको उहाँले जानकारी दिनुभयो ।

विश्व स्वास्थ्य संगठनले सन् २०२३ मा नेपालमा करिब ६८ हजार व्यक्ति क्षयरोग प्रभावित भएको उल्लेख गरेको छ । यसैगरी क्षयरोगका कारण १६ हजार व्यक्तिको मृत्यु भएको अनुमान  छ। केन्द्रले ४० हजार ७ सय ७६ जना क्षयरोगी उपचारको पहुँचमा आएको जनाएको छ । 

यस वर्ष (सन् २०२५ मा) हामी क्षयरोग अन्त्य गर्न सक्छौं। लगानीको प्रतिबद्धता र सेवा प्रवाहको सुनिश्चतता, आजको आवश्यकता भन्ने मुल नाराका साथ भोलि मार्च २४ मा नेपालमा पनि विश्व क्षययरोग दिवस मनाइँदै छ ।