स्वास्थ्य मन्त्रालयद्वारा मस्कुलर डिष्ट्रोफी उपचार र रोकथामका लागि समिति गठन 

नेपाल हेल्थ न्युज, काठमाडौं । स्वास्थ्य तथा जनसंख्या मन्त्रालयले मस्कुलर डिष्ट्रोफीको उपचार तथा रोकथाममा सुझाव दिन प्रा.डा. जगदिशप्रसाद अग्रवालको संयोजकत्वमा समिति गठन गरेको छ ।

मस्कुलर डिष्ट्रोफीको पहिचान, उपचार, रोकथाम एवं पुनर्स्थापनाका लागि दीर्घकालिन नीति तथा कार्ययोजना तयार गर्न स्वास्थ्य तथा जनसंख्या मन्त्री प्रदीप पौडेलले वरिष्ठ कन्सल्ट्यान्ट तथा न्युरोलोजिष्ट प्रा.डा. अग्रवालको संयोजकत्वको सुझाव समिति गठन गरेको हो ।

 समितिका सदस्यहरुमा त्रिवि शिक्षण अस्पतालका प्रा.डा. रोहितकुमार पोखरेल, मस्कुलर डिस्ट्रोफी फाउण्डेसन नेपालका अनिलकुमार उपाध्याय, त्रिवि शिक्षण अस्पतालकी प्रा.डा. मिता शाह राना तथा मन्त्रालयका नीति योजना महाशाखा प्रमुख डा. कृष्णप्रसाद पौडेल रहनुभएको छ ।  साथै नेपाल पिडियाट्रिक्स सोसाइटीका प्रतिनिधि तथा इपिडिमियोलोजी तथा रोग नियन्त्रण महाशाखाकी निष्ठा श्रेष्ठलाई सदस्य सचिव राखिएको छ ।