वरिष्ठ ‘शाही चिकित्सक’ डा. खगेन्द्रबहादुर श्रेष्ठको निधन, नेपालको चिकित्सा क्षेत्रमा अपूरणीय क्षति

नेपाल हेल्थ न्युज, काठमाडौँ । वरिष्ठ चिकित्सक डा. खगेन्द्रबहादुर श्रेष्ठको निधनले नेपालको चिकित्सा क्षेत्र स्तब्ध भएको छ ।  ८९ वर्षीय डा. श्रेष्ठले सर्वसधारणदेखि राजपरिवारसम्म आफ्नो चिकित्सकीय सेवा प्रदान गर्नुभएको थियो । ब्लुक्रस हस्पिटलका संरक्षक रहनुभएका श्रेष्ठको निधन बिहीबार बिहान भएको हो।

डा. श्रेष्ठ तत्कालीन राजा वीरेन्द्र तथा मुमा बडामहारानी रत्न राज्यलक्ष्मीदेवी शाहका निजी चिकित्सकको रुपमा सेवा  गर्नुभएको थियो । उहाँले २०५३ सालमा औपचारिक रुपमा ‘शाही चिकित्सक’को उपाधि प्राप्त गर्नुभएको थियो ।  राज परिवार हत्याकाण्डपछि २०५८ सालमा उहाँले सेवाबाट अवकाश लिनुभएको थियो । 

डा. श्रेष्ठ सिभिल एभिएसन मेडिकल एस्सेसर, खगेन्द्र स्पोर्ट्स फाउन्डेसनका संस्थापक अध्यक्ष तथा नेपाल लेप्रोसी रिलिफ एसोसिएसनका वरिष्ठ उपाध्यक्षका रुपमा पनि सक्रिय हुनुहुन्थ्यो । 

उहाँको पार्थिव शरीरलाई श्रद्धाञ्जलिका लागि आज कुपन्डोलस्थित निवासमा राख्ने र शुक्रबार अन्तिम संस्कार गरिने परिवारिक स्रोतले जानकारी दिएको छ।