सांसद एवं पूर्व स्वास्थ्य मन्त्री दीपक बोहराको निधन

नेपाल हेल्थ न्युज, काठमाडौँ । राष्ट्रिय प्रजातन्त्र पार्टी (राप्रपा) का वरिष्ठ नेता तथा रुपन्देही क्षेत्र नम्बर–३ बाट निर्वाचित सांसद दीपक बोहराको निधन भएको छ। उहाँले  काठमाडौंको ओम अस्पतालमा उपचारका क्रममा अन्तिम श्वास लिनुभयो । 

कोभिड–१९ महामारीको दोस्रो लहरमा संक्रमित भएपछि उहाँको स्वास्थ्यमा दीर्घकालीन असर देखिएको थियो । संक्रमणमुक्त भए पनि बोल्न गाह्रो भयो । त्यसको केही समयपछि घाँटीमा क्यान्सर देखियो ।  

बोहराको उपचारका लागि भारतको दिल्ली र अमेरिकाको न्यूयोर्कसम्म प्रयास गरिएको थियो। स्वास्थ्य समस्याका बाबजुद उहाँले राजनीतिक सक्रियता कायम राख्न प्रयास गर्नुभयो ।

उहाँ ३१ असोज २०७४ मा नेपाल सरकारको स्वास्थ्य तथा जनसंख्या मन्त्री बन्नुभएको थियो ।  राजनीतिक जीवनका क्रममा उहाँले स्वास्थ्य क्षेत्र सुधारका प्रयासमा भूमिका निर्वाह गर्नुभएको थियो ।