तीनकुने प्रदर्शनमा मृत्यु भएका सविन महर्जनको शव परिवारलाई हस्तान्तरण, गोली लागेको पुष्टि

नेपाल हेल्थ न्युज, काठमाडौँ ।  त्रिवि शिक्षण अस्पतालले तीनकुनेमा राजावादीहरुले गरेको प्रदर्शनका क्रममा ज्यान गुमाएका कीर्तिपुरका सविन महर्जनको शव परिवारलाई जिम्मा लगाएको छ।

सविनको शवको आजै पोस्टमार्टम गरिएको थियो। पोस्टमार्टमको क्रममा उनको शरीरमा एक गोली लागेको पुष्टि भएको छ। प्रहरी स्रोतका अनुसार गोली दायाँ हातको कुहिनो नजिकको भागबाट प्रवेश गरी कोख हुँदै ढाडबाट निस्किएको पाइएको छ।

१५ चैतमा राजावादीहरूले आयोजना गरेको आन्दोलनका क्रममा गोली लागेर सविनको मृत्यु भएको थियो। पोस्टमार्टमपछि उनको शव आजै पशुपति आर्यघाटमा दाहसंस्कार गर्ने तयारी गरिएको छ।