अमेरिकाद्धारा बर्ड फ्लू खोपसम्बन्धी मोडर्नासँगको सम्झौता रद्द

नेपाल हेन्थ न्युज, वासिङ्टन । अमेरिकी बायोटेक कम्पनी मोडर्नाले एच५एन१ एभियन इन्फ्लुएन्जाविरुद्धको एमआरएनए खोप विकासका लागि गरिएको ५९ करोड अमेरिकी डलरको सम्झौता अमेरिकी सरकारले रद्द गरेको जानकारी दिएको छ।

पूर्वराष्ट्रपति डोनाल्ड ट्रम्पको कार्यकाल समाप्त हुनुभन्दा केही दिन अघिको सम्झौता खारेज हुनु स्वास्थ्यमन्त्री रोबर्ट एफ. केनेडी जूनियरजस्ता खोपविरोधी विचार राख्ने व्यक्तिहरूको प्रभावका रूपमा हेरिएको छ।

खोप पशुपन्छीहरूमा देखिएको खतरनाक इन्फ्लुएन्जा भाइरसको मानवीय संक्रमणको सम्भावनालाई ध्यानमा राखी विकास गरिएको थियो। विज्ञहरूले यसलाई महामारीको रुप लिन सक्ने चेतावनी दिँदै आएका छन्।

मोडर्नाले हालै प्रारम्भिक क्लिनिकल परीक्षणमा ३०० सहभागीहरूमाथि गरिएको अध्ययनमा सकारात्मक नतिजा प्राप्त भएको जनाएको छ। कम्पनीका सिइओ स्टेफन बानसेलले जारी गरेको विज्ञप्तिमा भनेका छन्, “खोपको सुरक्षात्मक असर र प्रतिरक्षा प्रतिक्रिया उत्साहजनक छ। यद्यपि सरकारी लगानी रोकिएपछि हामी अन्य स्रोतहरूबाट अगाडि बढ्ने उपाय खोज्दैछौँ।”

उनले एमआरएनए प्रविधिले नयाँ भाइरसहरूप्रति द्रुत प्रतिक्रिया दिन सक्ने क्षमता रहेको उल्लेख गरेका छन्।

यसबीच, कोभिड-१९ महामारीको बेला बाइडेन प्रशासनमा प्रमुख स्वास्थ्य सल्लाहकार रहेका डा. आशिष झाले सामाजिक सञ्जालमा टिप्पणी गर्दै भने, “एमआरएनए प्रविधिमाथिको आलोचना निरर्थक छ। यही प्रविधिका कारण हामीले कोभिडविरुद्ध प्रभावकारी खोप बनाउन सफल भएका थियौँ।”

मोडर्नाले अब खोप विकासमा लाग्ने खर्चका लागि वैकल्पिक साझेदार वा स्रोतको खोजी गर्ने संकेत दिएको छ।