क्यान्सर उपचारमा नर्सिङ नेतृत्व

नर्सिङ सेवा केवल उपचार सहयोग मात्र होइन, सहानुभूति, समन्वय र नेतृत्वको संयोजन हो । प्रभावकारी प्रशिक्षण, टिमवर्क र पारदर्शी काउन्सेलिङमार्फत क्यान्सर बिरामीको उपचारलाई सहज र आशावादी बनाउन सकिन्छ ।
 
यहाँको जिम्मेरी बताइदिनुस् न ?
नर्सिङ सेवाको व्यवस्थापन, गुणस्तर सुधार तथा बिरामी–केन्द्रित सेवामा नेतृत्वदायी भूमिका निर्वाह गर्दै आएकी छु ।

यहाँको शैक्षिक पृष्ठभूमि के हो ?
म बी.एन. नर्स हुँ र मैले फूड एण्ड न्यूट्रिशनमा मास्टर डिग्री गरेकी छु । पोषण र नर्सिङको संयोजनले क्यान्सर बिरामीको समग्र हेरचाहमा मलाई थप सहयोग पु-याएको  छ ।

क्यान्सर बिरामीको हेरचाहमा नर्सको भूमिका कस्तो हुन्छ ?
क्यान्सर हुँदा बिरामीको जीवन एकाएक परिवर्तन हुन्छ । शारीरिक रूपमा तौल घट्नु, कमजोरी महसुस हुनु, औषधिले कपाल झर्नु जस्ता समस्या देखिन्छन् भने मानसिक रूपमा डर, तनाव र अनिश्चितता बढ्छ । नर्सिङ लिडरको रूपमा म आफ्ना स्टाफलाई भन्छु—‘पहिले आफूलाई बिरामीको स्थानमा राखेर सोच्नुहोस् ।’ सहानुभूति र संवेदनशील व्यवहार नै क्यान्सर केयरको मुख्य आधार हो ।

क्यान्सर बिरामीलाई मनोपरामर्श कसरी दिइन्छ ?
धेरै बिरामीको मनमा क्यान्सर उपचार अत्यन्त महँगो हुन्छ भन्ने धारणा हुन्छ । तर क्यान्सरका प्रकार र उपचार विधिअनुसार खर्च फरक–फरक हुन्छ । केही औषधि २५० रुपैयाँदेखि सुरु हुन्छन् भने केही २ लाख रुपैयाँसम्म पनि पर्न सक्छन् ।

त्यसैले सुरुमा नै बिरामीलाई रोगको अवस्था, उपचार प्रक्रिया र सम्भावित खर्चबारे स्पष्ट काउन्सेलिङ गरिन्छ । हाम्रो संस्थामा नर्स र कस्टुमर केयर टिमले उपचार कक्ष, शल्यक्रिया र सम्भावित खर्चको विवरण स्पष्ट रूपमा बुझाउँछन् । यसले बिरामीको डर र तनाव कम गरी मनोबल उच्च बनाउन ठूलो सहयोग पु-याउँछ ।