काठमाडौं क्यान्सर सेन्टरमा कार–टी सेल उपचार सेवा सुरु

नेपाल हेल्थ न्युज, काठमाडौं । नेपालमा क्यान्सर उपचारलाई नयाँ उचाइमा पु¥याउने उद्देश्यसहित काठमाडौं क्यान्सर सेन्टरले अत्याधुनिक कार–टी सेल थेरापी सेवा सुरु गरेको छ । सेन्टरका अनुसार प्रारम्भिक चरणमै केही प्रकारका रक्त क्यान्सरका बिरामीलाई यो उपचार उपलब्ध गराउने तयारी भइरहेको छ ।

पत्रकार सम्मेलनमा सेन्टरका पदाधिकारीहरूले नेपालमै उत्पादन गरिएको कार–टी सेल प्रयोग गरी उपचार गरिने जानकारी दिएका छन् । यसका लागि सेन्टर फर रिजेनरेटिभ मेडिसिनले आवश्यक प्रविधि विकास गरेको जनाइएको छ । यस सेवाले उपचारका लागि विदेश जानुपर्ने बाध्यता केही हदसम्म कम हुने अपेक्षा गरिएको छ ।

कार–टी सेल थेरापी आधुनिक इम्युनोथेरापी प्रविधि हो । यसमा बिरामीकै शरीरबाट टी–सेल नामक प्रतिरक्षा कोशिका निकालेर प्रयोगशालामा आनुवंशिक रूपमा परिमार्जन गरिन्छ ।

त्यसपछि ती कोशिकालाई पुनः बिरामीको शरीरमा प्रविष्ट गराइन्छ, जसले क्यान्सरका कोशिकालाई पहिचान गरी नष्ट गर्न मद्दत गर्छ । यो उपचार विशेषगरी केही प्रकारका ल्युकेमिया र लिम्फोमा जस्ता रक्त क्यान्सरमा प्रभावकारी मानिन्छ ।

सेन्टरका चिकित्सकहरूका अनुसार उपचारअघि बिरामीको विस्तृत परीक्षण गरिनेछ । उपचारका लागि उपयुक्त देखिएपछि टी–सेल संकलन, प्रयोगशालामा आवश्यक परिवर्तन तथा कोशिका वृद्धि गरी पुनः शरीरमा प्रत्यारोपण गरिने प्रक्रिया अपनाइनेछ । उपचारपछि बिरामीलाई केही सातासम्म चिकित्सकीय निगरानीमा राखिने व्यवस्था हुनेछ ।

सेन्टरले यस उपचारको अनुमानित शुल्क करिब ४५ लाख रुपैयाँ हुने जनाएको छ । सम्बन्धित पक्षका अनुसार यो लागत छिमेकी देश भारतको तुलनामा कम रहेको दाबी गरिएको छ ।

यसैबीच, काठमाडौं क्यान्सर सेन्टरले निकट भविष्यमा बोन म्यारो ट्रान्सप्लान्ट सेवा पनि सञ्चालन गर्ने तयारी गरेको जानकारी दिएको छ । यो सेवा सुरु भएपछि जटिल रक्त रोग तथा बोन म्यारोसम्बन्धी बिरामीलाई स्वदेशमै उपचारको विकल्प उपलब्ध हुने विश्वास गरिएको छ ।

क्यान्सर उपचारलाई थप प्रभावकारी बनाउन सेन्टरले अत्याधुनिक स्टेरियोट्याक्टिक लिन्याक मेसिन सञ्चालनमा ल्याएको जनाएको छ । यस प्रविधिबाट उच्च सटीकताका साथ रेडियोथेरापी सेवा प्रदान गर्न सकिने बताइएको छ ।

त्यसैगरी, क्यान्सर बिरामीको जीवनस्तर सुधार गर्ने उद्देश्यले पेन तथा प्यालिएटिभ केयरसम्बन्धी अनुसन्धान कार्यक्रम पनि सुरु गरिएको छ । यसका लागि बेलायत र जापानका शैक्षिक तथा स्वास्थ्य संस्थासँग सहकार्य भइरहेको सेन्टरले जनाएको छ ।

भक्तपुरको ताथलीस्थित काठमाडौं क्यान्सर सेन्टरले रेडिएसन अन्कोलोजी, मेडिकल अन्कोलोजी, केमोथेरापी, इम्युनोथेरापी, विभिन्न प्रकारका क्यान्सर शल्यक्रिया, रेडियोलोजी, प्याथोलोजी, आईसीयू तथा प्यालिएटिभ केयरलगायतका सेवा उपलब्ध गराउँदै आएको छ ।