न्यूनस्तरको डाबर हनी बजारबाट फिर्ता गर्न निर्देशन

नेपाल हेल्थ न्युज, काठमाडौं । खाद्य प्रविधि तथा गुण नियन्त्रण विभागले गुणस्तरहीन भेटिएको डाबर ब्रान्डको मह बजारबाट तत्काल फिर्ता गर्न निर्देशन दिएको छ।

बजार अनुगमन तथा नमुना परीक्षणका क्रममा डाबर हनी न्यूनस्तरको पाइएकोले विभागले उक्त उत्पादन बिक्री वितरण नगर्न तथा फिर्ता गर्न आदेश दिएको हो।

खाद्य स्वच्छता तथा गुणस्तर ऐन, २०८१ को दफा ३५(१) बमोजिम जारी आदेशअनुसार, डाबर हनी ५०० ग्राम प्याकेटमा रहेको ब्याच नम्बर NB00477 परीक्षणपछि न्यूनस्तरको खाद्य पदार्थ ठहरिएको छ।

उत्पादन मिति २०२५/१२ भएको उक्त महको उपभोग अवधि १८ महिना रहेको जनाइएको छ। विभागले सम्बन्धित उत्पादक तथा वितरकलाई उत्पादन बिक्री वितरण नगर्न निर्देशन गर्दै उपभोक्तालाई सचेत रहन आग्रह गरेको छ।