स्वास्थ्य पत्रकारका लागि सुनौलो अवसर : ६ महिनाको फेलोसिपमा मासिक ५० हजार

नेपाल हेल्थ न्युज, काठमाडौं । नेपाल इन्टेन्सिभ केयर रिसर्च फाउन्डेसन (एनआईसीआरएफ) ले स्वास्थ्य पत्रकारिताको गुणस्तर अभिवृद्धि गर्ने उद्देश्यसहित ‘स्वास्थ्य पत्रकारिता अध्ययनवृत्ति’ (हेल्थ जर्नालिज्म फेलोसिप) घोषणा गरेको छ ।

फाउन्डेसनले एरिटी हेल्थसाइन्सेसको सहयोगमा सञ्चालन गर्न लागिएको ६ महिनाको फेलोसिपमार्फत स्वास्थ्य क्षेत्रका जटिल र जनचासोका विषयमा गहन अनुसन्धान तथा तथ्यमा आधारित पत्रकारितालाई प्रोत्साहन गरिने जनाएको छ ।

फेलोसिपको मुख्य उद्देश्य विश्वव्यापी रूपमा बढ्दै गएको वातावरणीय संकट, महामारीको जोखिम, घातक प्रदूषण तथा एन्टिमाइक्रोबियल प्रतिरोधजस्ता चुनौतीपूर्ण विषयमा खोजमूलक र जनहितमुखी पत्रकारिता प्रवर्द्धन गर्नु रहेको छ ।

फाउन्डेसनले जारी गरेको सूचनामा नेपालमा स्वास्थ्य पत्रकारिता अझै सीमित स्रोत, न्यून प्राथमिकता तथा संस्थागत सहयोगको अभावका कारण अपेक्षित रूपमा विकास हुन नसकेको उल्लेख गरिएको छ । पछिल्ला वर्षहरूमा पत्रकारिता क्षेत्रले भोगिरहेको आर्थिक तथा पेशागत संकटका कारण स्वास्थ्य पत्रकारिता थप चुनौतीपूर्ण बन्दै गएको पनि सूचनामा जनाइएको छ ।

फेलोसिपका लागि छनोट भएका पत्रकारलाई ६ महिनासम्म मासिक ५० हजार रुपैयाँ उपलब्ध गराइनेछ । फेलोसिप अवधिभर अध्येताले कम्तीमा दुईवटा गहन खोजमूलक समाचार सामग्री तयार गरी प्रकाशन वा प्रसारण गर्नुपर्ने व्यवस्था गरिएको छ ।

कार्यक्रमअन्तर्गत डा. सुशील कोइराला, डा. उत्तम बाबु श्रेष्ठ, डा. युवराज आचार्य तथा सोनिया अवालेलगायतका विज्ञहरूले मेन्टरका रूपमा मार्गनिर्देशन प्रदान गर्नेछन् ।

यो अवसर नेपाली भाषामा लेख्ने तथा नेपालका सञ्चारमाध्यममा स्वास्थ्य पत्रकारितामा सक्रिय प्रारम्भिक वा मिड–करियर पत्रकारहरूका लागि लक्षित गरिएको आयोजकले जनाएको छ । आवेदनहरूको मूल्यांकन स्वास्थ्य र सञ्चार क्षेत्रका विज्ञहरूको स्वतन्त्र समूहले गर्नेछ ।

इच्छुक पत्रकारहरूले विगत दुई वर्षभित्र प्रकाशित वा प्रसारित आफ्ना उत्कृष्ट तीन सामग्री, आगामी ६ महिनाको कार्ययोजना तथा आफूले छनोट गरेको विषयमा अनुसन्धान गर्ने संक्षिप्त योजनासहितको कभर लेटर पेश गर्नुपर्नेछ ।

आवेदन दिने अन्तिम म्याद २०८३ असार १ गते दिउँसो १२ बजेसम्म तोकिएको छ । आवेदकहरूले आवश्यक सम्पूर्ण कागजात एउटै पीडीएफ फाइलमा राखी [email protected] मा इमेलमार्फत पठाउन सक्नेछन् ।