मधेश सरकारले ल्यायो ४१ अर्ब १३ करोड ८६ लाखको बजेट

नेपाल हेल्थ न्युज, जनकपुरधाम । मधेश प्रदेश सरकारले आगामी आर्थिक वर्ष २०८३/८४ का लागि ४१ अर्ब १३ करोड ८६ लाख रुपैयाँको बजेट सार्वजनिक गरेको छ ।

सोमबार प्रदेश सभामा अर्थमन्त्री युवराज भट्टराईले प्रस्तुत गरेको बजेटमा चालुतर्फ १४ अर्ब ६६ करोड ३२ लाख २९ हजार र पुँजीगततर्फ २६ अर्ब ४७ करोड ५३ लाख ७१ हजार रुपैयाँ विनियोजन गरिएको छ ।

यसअनुसार कुल बजेटमा चालु खर्च ३५.५४ प्रतिशत र पुँजीगत खर्च ६४.३५ प्रतिशत रहेको छ ।

बजेटमा कृषि, शिक्षा, स्वास्थ्य, पूर्वाधार र वन क्षेत्रलाई प्राथमिकतामा राखिएको छ । स्रोत व्यवस्थापनतर्फ आन्तरिक राजस्वबाट ११ अर्ब २२ करोड ७५ लाख, संघीय राजस्व बाँडफाँटबाट १२ अर्ब ८३ करोड र वित्तीय अनुदानबाट ९ अर्ब ४९ करोड ५९ लाख रुपैयाँ प्राप्त हुने अनुमान गरिएको छ ।

साथै चालु आर्थिक वर्षको बाँकी नगद मौज्दातबाट ६ अर्ब ८ करोड ५२ लाख र आन्तरिक ऋणबाट १ अर्ब ५० करोड रुपैयाँ जुटाइने सरकारको योजना छ ।

संघीय सरकारबाट प्राप्त हुने अनुदानमध्ये वित्तीय समानीकरण अनुदान ७ अर्ब ८४ करोड ८५ लाख, सशर्त अनुदान ८ अर्ब १० करोड २८ लाख, समपूरक अनुदानबाट ७० करोड गरी जम्मा १७ अर्ब ५९ करोड ८७ लाख प्राप्त हुने अनुमान बजेटमा उल्लेख छ ।