एकेडेमिक कार्यलाई थप व्यवस्थित बनाउने छौंः डा. युवराज लिम्बु

जनस्वास्थ्य सरोकार, काठमाडौँ। वरिष्ठ कन्सल्टेन्ट कार्डियोलोजिष्ट डा. युवराज लिम्बु यतिखेर शहीद गंगालाल राष्ट्रिय हृदय केन्द्रमा निमित्त कार्यकारी निर्देशक हुनुहुन्छ । नेपालको पूर्वी पहाडी जिल्ला तेह्रथुममा जन्मिएका डा. लिम्बुले चीनको औधोगिक शहर संघाईको संघाई मेडिकल युनिभर्सिटी (हाल फुतान युनीभर्सिटी) बाट चिकित्साशास्त्रमा स्नातक, कार्डियोलोजीमा स्नातकोत्तर र पीएचडी गर्नुभएको छ । उहाँ केन्द्रमा करिब २० वर्षदेखि निरन्तर रुपमा कार्यरत हुनुहुन्छ । निमित्त कार्यकारी निर्देशक भैसकेपछि के कस्ता योजना अघि बढाउनु भएको छ ? विगत लामो समयदेखि कार्यरत रहेकाले केन्द्रको सेवा सुबिधा बिस्तारहरुबारे जानकार छु । जतिसक्दो चाँडो बिरामी, आगन्तुक र कर्मचारीहरुको सुविधालाई ध्यानमा राखेर केन्द्रको भौतिक संरचनामा सुधार गर्नेछौं । अध्ययन, अनुसन्धान, ट्रेनिंग लगायत अन्य एकेडेमिक कार्यहरुलाई व्यवस्थित गर्नेछौं । कार्डियोलोजी, कार्डियोभास्कुलर सर्जरी र पिडियाट्रिक कार्डियोलोजी सेवा अन्तर्गतका सुपर स्पेसियालिटी एवं प्रिभेन्टिभ सेवाहरुलाई अझ वैज्ञानिक, प्रभावकारी र सर्वसुलभ बनाउने छौं । आकस्मिक, नर्सिङ सेवा र ल्याब सेवालाई गुणस्तरीय बनाउन प्रतिबद्ध छौं । हस्पिटल प्रशासन र आर्थिक अनुसाशनलाई प्रभावकारी बनाउँदै केन्द्रलाई शैक्षिक संस्थाको रुपमा विकास गर्ने र नेपालका सातै प्रदेशमा क्रमश गुणस्तरीय सेवा उपलब्ध गराउने अभियानमा काम अघि बढेको छ । केन्द्रमा बिरामीको चाप कस्तो छ ? बिरामीको चाप बढिरहेको छ । दैनिक ६ सय—७ सय बिरामीहरुले बहिरंग सेवा लिन्छन् । चाड पर्व र मौसम प्रतिकुल नभएको अवस्थाबाहेक अन्तरंग सेवाअन्तर्गत सम्पूर्ण हस्पिटल बेडहरु प्रायः शत्प्रतिशत नै उपयोग भइरहेका छन् । आकस्मिक सेवा र सुबिधा कतिको भरपर्दो र जनमुखी छ ? चिकित्सकीय ज्ञानमा हरसंभव अपडेट रहन्छौं । प्रविधिहरुको पूर्ण रुपमा उपयोग गरिरहेका छौं । आकस्मिक बिरामीहरुले पाउने सेवा भरपर्दो छ । देशभरिबाट बिरामीहरु आउने भएकोले केन्द्रको सेवा जनमुखी छ । केन्द्र पुग्ने सबैले सेवा पाउन सक्छन ? हालसम्म बिरामीहरुको उपचारमा कमी आउन दिएका छैनौं । दिनानुदिन बिरामीको चाप बढ्दै जाँदा थप भौतिक पूर्वाधार र दक्ष जनशक्तिबारे सोच्नैपर्छ । बिरामीको चापले केन्द्रमा बेड नपुग्दा कहिलेकाहीँ अन्तै रिफर गर्नुपर्ने अवस्था पनि आउँछ । यसलाई कसरी सहज बनाउन सकिएला ? आकस्मिक र बहिरंग सेवा नयाँ भवनमा सरेपछि बिरामीको भीड व्यस्थापनमा केहि सहज भएको छ । बिरामीहरुको संख्या र चापलाई ख्याल ख्याल गरेर भौतिक संरचनामा सुधार गरी अझ सहज र व्यवस्थित बनाउने योजना छ । राजनीतिक दवाव कतिको आउँछ ? पोलिटिकल कलर र पोलिटिकल फ्लेभरको आधारमा उपचार गर्न हाल सम्म कुनै दवाव आएको छैन । नेपाल सरकारको सहयोगमार्फत् ७५ बर्ष मथिका जेष्ठ नागरिक र १५ वर्ष मुनिका बालबालिकाहरुको मुटुरोगसम्बन्धि सम्पूर्ण उपचार निःशुल्क छ । नेपाल सरकारको सहयोगमा प्रत्येक विपन्न नागरिकले रु.एक लाख रुपियाँसम्मको उपचार खर्चमा छुट पाउँछन् ।