सेन्टरको दोस्रो विज्ञप्ति: प्रधानमन्त्री ओलीको स्वास्थ्यवस्था स्थिर [अपडेट]

जनस्वास्थ्य सरोकार, काठमाडौं । महाराजगन्जस्थित मनमोहन कार्डियोथोरासिक भास्कुलर तथा ट्रान्सप्लान्ट सेन्टरले प्रधानमन्त्री केपी शर्मा ओलीको स्वास्थ्यवस्था स्थिर रहेको जनाएको छ । आज बेलुका ७.३० बजे दोस्रोपटक विज्ञप्ती जारी गर्दै प्रधानमन्त्री ओलीको स्वास्थ्यवस्था स्थिर रहेको जनाएको हो । सेन्टरका कार्यकारी निर्देशक प्रा.डा. उत्तमकृष्ठ श्रेष्ठद्धारा जारी विज्ञप्तीमा  प्रधानमन्त्रीको एपेन्डिसाइटिसको शल्यक्रियापश्चात् सघन उपचार कक्षमा उपचार भइरहेको बताइएको छ । प्रधानमन्त्री ओलीको मंगलबार दिउँसो महाराजगन्जस्थित मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा एपेन्डिसाइटिसको शल्यक्रिया भएको हो । पेट दुखेपछि मंगलबार बिहान ९ बजे प्रधानमन्त्री ओलीलाई स्वास्थ्य परीक्षणका लागि सेन्टरमा लगिएको थियो ।