कोरोना भाइरसविरुद्ध संघर्ष गरिरहेको चीनलाई साथ दिन काठमाडौंमा ‘हामी साथमा छौं’ कार्यक्रमको आयोजना

काठमाडौं । कोरोना भाइरसविरुद्धको संघर्षमा लडिरहेको चीनलाई साथ दिन बुधबार काठमाडौंमा ‘हामी साथमा छौं’ कार्यक्रम आयोजना गरिएको छ । मन्त्री, सांसद, नेपालका लागि चिनियाँ राजदूत, कलाकार, पत्रकार तथा सर्वसाधारणको बाक्लो उपस्थितिमा दीप प्रज्वलन गरिएको हो । ट्रान्स हिमालय विकास केन्द्र र फ्रेण्ड्स अफ सिल्क रोडले आयोजना गरेको कार्यक्रममा नेपाल र चीनको झण्डा बनाई मैनबत्ती बालेर ‘हामी साथमा छौं’ भन्ने सन्देश दिइएको थियो । कार्यक्रममा चिनियाँ राजदूत होउ यान्छीले चीनले बेहोरिरहेको विपत्तिप्रति नेपालले देखाएको सद्भावको प्रसंशा गर्नुभयो । कार्यक्रममा कलाकार, साहित्यकारले कोरोनाविरुद्धको अभियानमा चीनलाई परेको विपत्तिमा ‘हामीसँगै छौँ’ भन्दै गीत, कविता सुनाएका थिए । आफ्नो देशमा परेको सङ्कटप्रति नेपालले देखाएको सहानुभूतिबाट राजदूत होउ यान्छी भावुक देखिनुहुन्थ्यो । कलाकार आनी छोइङ डोल्माको गीत र कवि बलराम दाहालको कविताले सबैलाई मन्त्रमुग्ध बनाएको थियो । हास्य कलाकार मनोज गजुरेलले कविताबाट सामाजिक सञ्चालमा कोरोना भाइरसबारे भइरहेका अनावश्यक हल्लाले मानिसमा त्रास उत्पन्न गरेको बताउनुभयो । भूमि व्यवस्था, सहकारी तथा गरिबी निवारणमन्त्री पद्माकुमारी अर्यालले मित्रराष्ट्र चीनमा परेको सङ्कट समाधानमा नेपाल सरकार आवश्यक सहयोग गर्न तयार रहेको बताउनुभयो । “चीनले अत्याधुनिक प्रविधिको प्रयोगमार्फत कोरोना भाइरसको सङ्कटलाई धेरै हदसम्म कम गर्न सफल भएको छ”, उहाँले भन्नुभयो, “नेपालको विपत्तिमा पटक–पटक सहयोग गर्दै आइरहेको चीनलाई परेको विपत्तिमा नेपाल सक्दो सहयोग गर्न तयार छ ।” राजदूत यान्छीले कोरोनाविरुद्धको अभियानमा नेपालले दर्शाएको सदासयताप्रति धन्यवाद दिँदै नेपालको सहयोगले चीनलाई थप ऊर्जा प्रदान गरेको बताउनुभयो । उहाँले चिनियाँ राष्ट्रपति, प्रधानमन्त्रीलगायतका सरकारी अधिकारी तथा नागरिकको सक्रियताका कारण वुहान शहर कोरोनाको सङ्क्रमणबाटमुक्त हुने दिशामा अग्रसर बन्दै गएको बताउनुभयो । नेपाली काँग्रेसकी नेतृ सुजता कोइरालाले कोरोना भाइससबाट सङ्क्रमित भएकाको उपचारका लागि चीन सरकारले देखाएको चिन्ता र चासोबाट अरु मुलुकले पनि पाठ सिक्नुपर्ने धारणा राख्नुभयो । पूर्वमन्त्री आनन्द पोखरेलले माहामारी वा विपत्ति जुनसुकै राष्ट्रलाई पनि पर्नसक्ने हुँदा यो समस्या चीनको मात्र नभएर सम्पूर्ण मानवजगतको भएको धारणा राख्नुभयो । फोटो: मनोज गजुरेलको फेसबुकबाट