कोरोना भाइरस (कोभिड–१९) को संक्रमणका कारण आगामी साता कोरिया जाने तयारीमा रहेका ४० जना नेपाली रोकिए, ५० दिनका लागि भिसा थप गर्ने तयारी

जनस्वास्थ्य सरोकार, काठमाडौं । कोरोना भाइरस (कोभिड–१९) को संक्रमणका कारण आगामी साता कोरिया जाने तयारीमा रहेका ४० जना नेपाली रोकिएको छ । यही फागुन १८ गते पठाउने तयारी भइरहेको उनीहरुलाई रोकेर ५० दिनको भिसा थप गर्ने तयारी भइरहेको वैदेशिक रोजगार विभाग इपिएस शाखाका निर्देशक कृष्णप्रसाद खनालले जानकारी दिनुभएको छ । घरविदामा आएका उनीहरुको कोरियाले ५० दिनको भिसाको म्याद थप गर्ने भएको छ । हालसम्म ६३ हजार २ सय ८० जना नेपालीहरु रोजगारका लागि इपिएसमार्फत कोरिया पुगेका छन् । सन् २०२० मा करिब ७ हजार नेपाली रोजगारीका लागि दक्षिण कोरिया जाँदै छन् । यसैबीच, संक्रमित क्षेत्रमा समेत नेपाली कार्यरत रहेकाले कोरियास्थित नेपाली दूतावासले सावधानी अपनाउन अपिल गरेको छ । दक्षिण कोरियाली सञ्चारमाध्यमका अनुसार हालसम्म त्यहाँ साढे पाँच सयभन्दा बढीमा भाइरसको संक्रमण पुष्टि भइसकेको छ ।