जनस्वास्थ्य सरोकार, काठमाडौँ ।  कोरोना भाइरस संक्रमणको सम्भावित जोखिमलाई ध्यानमा राखी सरकारले यस वर्ष होली पर्व नमनाउन आग्रह गरेको छ । सोमबार परराष्ट्रमन्त्री प्रदीपकुमार ज्ञवालीले मन्त्रालयमा आयोजित पत्रकार सम्मेलनमा सो कुरा बताउनुभएको हो । उहाँले यस वर्षको होली उत्सव नमनाउन र ठूला जमघट नगर्न आग्रह गर्नुभयो । कोरोनाको सम्भावित संक्रमण रोकथामका लागि सरकार गम्भीर बनेको भन्दै उहाँले नागरिकहरुलाई भरसक भीड हुने कार्यक्रम नगर्न, सहभागी नहुन आग्रह गर्नुभयो । उहाँले भन्नुभयो, ‘भीडभाड हुने गरी कुनै काम नगरौं । सकभर भीड हुने कामबाट टाढै बसौँ । यसपटक होली पनि नमनाऔं ।’ उहाँले विवाहजस्ता उत्सवलाई पनि आफ्नो पारिवारिक विषय मात्रै बनाउन र ठूला भेला, भोजभतेर नगर्न आग्रह गर्नुभयो । नेपाल कोरोना भाइरसबाट मुक्त रहेको भन्दै हुनसक्ने संक्रमणबाट जोगाउनका लागि सबै सचेत बन्नुपर्ने र जोखिम बढ्न नदिन सरकारले पनि विभिन्न कदम चालिरहेको उहाँको भनाइ थियो । उप-प्रधान तथा रक्षामन्त्री ईश्वर पोखरेलकाे नेतृत्वमा मन्त्रीहरु सम्मिलित काेरोना भाइरस रोकथाम समन्वय समिति गठन गरेकाे र मुख्य सचिवको नेतृत्वमा स्टेरिङ कमिटी तथा प्रधामन्त्री कार्यालयका सचिव नारायणप्रसाद बिडारीको संयोजकत्वम वर्किङ टिमले यसका लािग काम गरिरहेको जानकारी पनि मन्त्री ज्ञवालीले दिनुभयाे । विदेशी पर्यटकलाइ अन-अराइभल भिसा स्थगित गरेकाे र कोरोना प्रभावित देशमा अध्ययन गर्न जाने नेपाली विद्यार्थीलाई एनओसी (नो अब्जेक्सन लेटर) जारी गर्न रोक लगाएकाे पनि उहाँले बताउनुभयाे ।

होलीमा विशेष ध्यान दिन चिकित्सकको सुझाव

कोरोना भाइरस संक्रमणको सम्भावित जोखिमलाई मध्यनजर गर्दै चिकित्सकले होली पर्वमा स्वस्थ्यप्रति विशेष ध्यान दिन सुझाव दिएका छन् । कोरोनाको भाइरसको सङ्क्रमणबाट जोगिन सबैभन्दा पहिले व्यक्ति आफैँ सचेत हुनुपर्ने चिकित्सकले सुझाव दिएका हुन् । होलीमा भीडभाड हुने, पानीमा भिज्दा रुघा खोकीको सम्भावना बढ्ने हुँदा होलमा विशेष ध्यान दिन चिकित्सकले सुझाएका हुन् । होली पर्वमा एक अर्कालाई अबिर र रङ्ग लगाउँदा वा पानी खेल्दा मानिस मानिसबीचको दूरी नजिक हुने हुँदा रुघोखोकी सर्ने सम्भावना धेरै टेकु अस्पतालका प्रवक्ता एवं सरुवा रोग विशेषज्ञ डाक्टर अनुप बाँस्तोलाले बताउनुभयो । अहिले कोरोनाको उच्च जोखिम रहेकाले सकेसम्म समूहमा नहिँड्न र समूहमा नबस्न पनि डाक्टरको आग्रह छ । सङ्क्रमण फैलिनुअगावै सतकर्ता अपनाउन सके कोरोनाको संक्रमणलाई रोक्न सक्ने भन्दै डाक्टरले होलीमा धेरै पानी नखेल्न पनि सुझाव दिएका छन् । यस वर्षको होली पर्व फागुन २६ र २७ गते परेको छ । मिथिलाञ्चल क्षेत्रमा सोमबारबाटै होली उत्सव सुरु भइसकेको छ । काठमाडौँमा पनि होली पर्वको विधिवत् सुरूवात मंगलबारबाट भइसकेको छ । होली सुरू भएको संकेतस्वरूप वसन्तपुरमा आज बिहान ७ बजेर ५७ मिनेटको साइतमा विधिपूर्वक चीर ठड्याइएको छ । जुन चीर ठड्याएपछि नै काठमाडौं उपत्यकासहित देशैभरि होली पर्व सुरु भएको मानिन्छ । भीडभाड र उत्सवमा तीव्र रूपमा फैलिने भएकाले कोरोना भाइरस विश्वभरि नै खतरनाक मानिएको छ । चीनको वुहानबाट फैलिएको कोरोना भाइरस अहिलेसम्म चीनसहित विश्वभरि झन्डै ७० देशमा फैलिसकेको छ भने ९० हजार भन्दा बढी मानिसमा सङ्क्रमण देखिएको छ । यसमध्ये झन्डै ९० प्रतिशत सङ्क्रमण चीनमै पाइएको छ । चीनबाहेक अन्य १० देशमा पनि यही भाइरसका कारण मानिसहरूको मृत्यु भएको छ, विश्वभरि कुल मृतक संख्या ३ हजार नाघेको छ ।