प्रधानमन्त्रीको स्वास्थ्यमा क्रमिक सुधार हुँदै

जनस्वास्थ्य सरोकार, काठमाडौं । दोस्रोपटक मिर्गौला प्रत्यारोपण गरेका प्रधानमन्त्री केपी शर्मा ओलीको स्वास्थ्यमा क्रमिक सुधार आएको छ । उहाँको काठमाडौंको त्रि.वि.शिक्षण अस्पतालमा फागुन २१ गते मिर्गौला प्रत्यारोपण गरिएको थियो । प्रधानमन्त्री ओलीले मिर्गौला प्रत्यारोपण गरेको दोस्रो दिन झोलिले खानेकुरा खान थाल्नुभएको प्रधानमन्त्रीका निजी प्रेस सल्लाहकार सूर्य थापाले जानकारी गराउनुभएको छ । ओलीका अन्य सूचकहरु सामान्य अवस्थामा रहेका छन् । प्रधानमन्त्री ओलीको शल्यक्रिया कक्षबाट हिजोदेखि नै प्रत्यारोपण उपचार कक्षमा राखेर उपचार भइरहेको छ । दोस्रो पटक सफल मिर्गौला प्रत्यारोपण गरिएका ओलीलाई भान्जी पर्ने समीक्षा संग्रौलाले एउटा मिर्गौला दान गर्नुभएको थियो । ओलीको एउटा मिर्गौलाले काम गर्न छाडेपछि २०६४ सालमा भारतको एपोलो अस्पतालमा पहिलो पटक मिर्गौला प्रत्यारोपण गरिएको बेला सहभागी भएका प्रा.डा. अनन्तकुमार नेपालमा दोस्रोपटकको प्रत्यारोपणमा पनि सहभागी हुनुभएको थियो । प्रधानमन्त्रीको शल्यक्रिया टोलीमा वरिष्ठ प्रत्यारोपण सर्जन प्रा.डा. उत्तम कुमार शर्मा, प्रा.डा. प्रेमराज ज्ञवालीको टिम खटिएको थियो । एक टोलीले दाताको मिर्गौला झिक्ने र अर्कोले प्रत्यारोपण गरेको थियो । मिर्गौला शल्यक्रियापछि करिब १० दिनजति अस्पतालमा चिकित्सकको निगरानीमा रहनुपर्ने चिकित्सकहरुको सल्लाह छ । स्वास्थ्यमा समस्या देखिएपछि ओली उपचारका लागि गत भदौमा सिंगापुर ‘प्लाज्माफेरेसिस’ का लागि जानुभएको थियो । करिब २ हप्ताको उपचारपछि स्वदेश फकिर्नुभएका उहाँ गत कात्तिकदेखि नियमित डायलाईसिसमा हुनुहुन्थ्यो ।